Vos cnoxhoz tortotes et tertos li floriconte di sint Houbert. On fwait l’ voye [pèlerinage] viè l’ Bork [Saint-Hubert-ville] po s’ waeranti do må d’ araedje et rweri les mås d’ dints.
Dins les rleyaedjes di l’ istwere, on cåze todi ossu di Plectrou [Plectrude], des abés come Don Spirlet et des araedjîs.
Mins l’ istwere do Bork a conoxhou des ôtes floricontes, k’ on n’ è djåze cåzu djamåy.
Vo-z è la onk.
Dins totes les eglijhes et les abeyes, i gn aveut ene pitite plaece po sognî les djins k’ on djheut k’ avént l’ Diåle dins leu coir.
Si on djheut çoula avou råjhon ou nén, dji n’ vos l’ såreu dire. Lesseur ki, pa des côps, end aveut k’ estént dits « macreas » djusse pa des malignants k’ estént djalots [déclarés sorcier par jalousie].
I vikéve do trevén des abés Balla pu Di Masbork. C’ esteut on tchesseu d’ diåles (egzôrçuleu).
On l’ veyeut foirt voltî, shonne-t i, pask’ il adiercive todi s’ côp [il réussissait]. On té succès vineut d’ ses priyires et d’ ses djoûs d’ djune (les djoûs k’ i dmoréve sins magnî). Ey ossu di s’ fwè.
Djan n’ aveut pus k’ on bresse, li droet, po fé ses cayets, paski l’ gåtche esteut moirt.
Comint lu, on grand sierveu do Bon Diu, aveut polou atraper ene paralizeye ?
On dit k’ il a yeu çoula e 1606, après aveur tchessî les diåles Leviatan, Belzebute et Astarote, padfoû do coir d’ ene djonne feye d’ ene vintinne d’ anêyes.
On dit co k’ il a bouté troes moes å long po-z î ariver.
On nos dit co todi ki mwais d’ awè stî « fotous a l’ ouxh », les troes diåles l’ ont atrapé, et l’ ont misdrouyî, el laixhant la po moirt.
Li Bon Diu l’ a såvé, mins dins l’ istwere, il a pierdou si gåtche bresse.
Il a cwanlminme morou e 1619 a Såci (dé Udindje, e payis d’ Årlon).
Mins vola ! Est ç’ li vraiy, çou k’ on dit ? Ba ! Dji vos l’ dene po çki ça m’ costêye.