Cronike d’ ene minêye/VI

Èn årtike di Wikisource.
Ciste ouve ci egzistêye eto divins ds ôtès ortografeyes : Mwaisse modêye (sicrijhaedje espontané)Rifondou.
VI
rortografiaedje da Lucyin Mahin
Ça s’ arestêyrè on djoû !

Åy, on-z è cåze.

Asteûre, les djins ont cåzu rçû tertos leu troejhinme picaedje et … li rlomé Passe-Avant Minêye (PAM). K’ i lomnut e-n inglès « Corona Virus Disease Safe Ticket ». Sins ça, pont d’ sôrtixhaedje… c’ est on « laixhî-passer ». Ey on ls ôt flamter « Av vosse CST ? ».

Åy mins les rouscayeus n' è vlèt pont ! C' est foirt ! Bén åy : c' est l' « liberté », ki bråmint des djins vlèt awè. Et les ôtes shuvèt come des bedot ki binlèt. Et evoye al capitåle po criyî leus ågnreyes !

Dins tos les payis, li minêye è va. Les djins sont moens malådes et les ospitås s' vudèt.

Li CODECO[1] nos rasseure et rdrove a pô près tot !

Il est tins !

Asteure, les « psis » vont awè di l’ ovraedje, sortot avou les djonnes. Et on les comprind : pont di scole, pont d' sôrteyes, pont d’ amuzmints, pont d’ ocupaedje sociå ! C' est deur di viker insi !

Les djonnes, ça doet bodjî et vey des pareys a zels !

Les spôrts vont rfé bodjî l' djonnesse et motoit les ôtes ossu. Nosse santé end a prins on côp.

Fåt tot rmete so pî. On prind s’ coraedje a deus mwins et : hay des guetes !

On doerè todi wårder nos bounès manires mins on n' doerè pus poirter l' masse ! Ouf ! Bin, ça va fé do bén po tolmonde. On pôrè respirer a s'-n åjhe et ou çk’ on vout !

Li vaccinaedje continouwrè po les pus fråjhûles : il åront droet a on cwatrinme picaedje.

Nos minisses nos vont anoncî ene veye pus bele et, e-n atindant, boune djournêye et ki ça vos våye bén tot l’ resse di l’ anêye.

Riyoz, tchantez ! Li veye est bele ! Il î fåt croere !

  1. Comitî bedje di goviene del minêye.