Dj’ estans e moes d’ decimbe, li dierin di l’ anêye et on-z è cåze co… motoit po on bon moumint. Ci n’ est cåzu nén possibe ! Et les linwes vont bon trén. Des mwaijhès linwes et des bounès linwes. Mins cwè vloz ! Les djins end ont leus cint kilos !
Bén cåzans è ossu dabôrd !
C’ est ene maladeye cåzêye pa on virûsse. Ou purade des virûsses. Mins c’ est des près-parints inte di zels. End deus ôtes, asteure, di ces wayimants la : li « delta » ki vént d’ Azeye, et l’ « omicron », ki vénreut d’ Afrike do sud d’ après les sincieus.
Ey on eploctêye a grands côps; minme les efants a pårti di 6 ans ! Li vaccinaedje va don bon trén. Li troejhinme dôze a stî decidêye e moes d’ octôbe, å cmince po les viyès djins, et shure po tolmonde. Des rouscayeus, i gn end a ! Tchaeconk a droet å respet du s’ veye privêye… mins li bén di tertos passe divant li liberté d’ ene mierdjin, hin !
Les cis ki ovrèt dins les clinikes, les infirmire·î·s si dvront fé eplocter pol moes d’ djanvî… Oblidjîs, valet ! Mins gn a bråmint ki n’ sont nén dacoird et… alez hay ! c’ est des manifs a Brussele ! Ci n’ est nén rén ! Les ospitås rissont plins a hope avou des… nén eploctés, bén seur ! Cwè sondjî di tot ca ?
On « ercodecote » (li tåvlotêye di manaedjmint del minêye fwait des noveas raploûs). Adon, les minisses ponèt des novelès mzeures po les scoles, po les cafès, les restorants, les racaweus d’ shijhe. Mins ça n’ elzî convént nén. Gn a on manke a wangnî et i n’ ténront nén avou co ç’ laid côp la, ces djins la !
Po l’ ridire platkizak: les djins end ont leu sô !
Li copete des noveas cas est houte paret ! Li dischinte va kimincî et li cwatrinme waclêye ‒ li troejhinme rispitaedje ‒ shonne tårdjî tot belotmint !
Motoit k’ e 2022, on serè binåjhe et ki ci n’ srè pus k’ ene mwaijhe sovnance ! Dijhans todi kécfeye.
E ratindant : bounès fiesses a tertotes et tertos ! Bråmint d’ amour dins vos familes et ene volêye di betches ås djins do monde etir.
Bon Noyé et boune anêye.
sucrît li 19 di decimbe tot cåzant des noveles del minêye dispu l' moes d' awousse; eplaidî avou kékes mots ratournés e francès, siné E.G.