Vo m' rila avou mi ptit mot.
Vo nos la e moes d’ may et on pike co, on pike bråmint, les djonnès djins come les viyès djins !
Totes les viyès djins, des swessante-ans ås cintnaires, sont pikés…
Asteure, å toû des djonneas et des djonnetes di 15 a 17 ans, avou l’ acoird des parints. C' est k' c' est dabôrd fini…
Ci n' est nén ene oblidjance mins cåzu. On vs î poûsse foirt, et c' est bén insi.
Ûtante-troes åcint des djins di nosse payis sont pikés. C' est les cis ki schoûtèt bén…
Mins des cis ki gn a sont co sol kî-vive: si mete les vexhotes u nén ? C' est tote li kession.
Et pocwè nén ?
Les cis ki n' vlèt nén n’ etindèt k’ on son d' sounete. Et n' nén vleur etinde l' ôte son.
On vike eshonne : on s' doet fé eplocter !
Boune novele : li disrecloyaedje arive ! Doûçmint mins surmint !
Gn a ttafwait ki rdrouve. Les restos, les cafès, les cinemas, les fiesses, les eglijhes, les parks. Les djins rsôrtixhèt dins les botikes. On si rpormoenne, les tourisses rivnèt, mins on doet shure les droetès lenes do govienmint ! Todi les waerantixhantès djesses (si mete erî d' n' onk l' ôte, sins rabressaedje ni dnaedje di mwin; mete des masses; laver ses mwins).
On-z est mî; on ravigote, on rvicote… Dj' estans e moes d' awousse. Il esteut tins !
Po les voyaedjes, c' est co målåjhey. Gn a bråmint des payis ki sont co e l' rodje zône. I fåt-z esse piké et prezinter li passe-avant Corona. Ci n' est nén rén !
E portant, on cwirt li solea; on l' vout ndaler cweri.
Houte do Covite, gn a bråmint des djins k' on yeu les aiwes. Les gros bîs, les rivires, les mouzes ont brotchî foû d' leu lét et enaiwer des viyaedjes do costé d’ Lidje, di Nameur u d' Dinant.
Povès djins, pupont d' måjhon, pus rén.
I faleut co bén ça ! On dit todi k' ene rascråwe ni vént måy tote seule. Bén waite: c' est co bén l' cas !
Ureuzmint k' on-z a veu di l' etraidance pattavå et k' on è voet co !
Pol moumint, gn a on novea wayimant virusse di nosse gripe chinwesse (dji rprind l' prumî lomaedje del minêye) ki rôle dins tote l' Urope. On l' lome li variant delta. Il est co pus teribe ki ls ôtes et il atake les djonnes. Avår ci, c' est l' fôre di Libråmont ki l' a rispårdou dins les viyaedjes. Adon: noveas tesses et noveas picaedjes. On n' è rexhrè don nén ! Ouf ! Gn a bråmint des djins k' estént ddja vaccinés. Pus d’ peu ki d' må ! On a fwait l' diåle pus noer k' i n' est.
Li monde toûne a l’ evier. Totafwait va må mins… coraedje ! On va bénrade moussî foû di ces mizeres la. Dijhans todi kécfeye !
« C' est l' rashonnaedje ki fwait l' foice. »
Dj' estans des Bedjes, cwè !
sucrît lu 16 d' awousse 2021 tot cåzant des noveles del minêye dispu l' fén do moes d' may.