Dj'ai yu les cingues è 1990. Gn avot èn ome ki wèrixhot do scret a Graide. Dji lî a tèlèfoné. I m' a dit k' i faleut ki dj' fwaije ène nouvin.ne a Sint Antwane et Sint Lorint.
Cwand dj' èsteus ptite, on-z aleuve dèdja trover l' mame di ci ome la po l' fîvlin.ne (fièvre lente) et les mås d' sints.
On-z a co stî mwints côps a pèrlinaedje a Sint Utrope a Palijoû po les maladéyes d' èfants. Les fames poirtént ls èfants su leus brès.
C'est come les djèles (dartres) ; dj' end aveus atrapè yene å minton ; dj' aveus stî å docteur ; I m' aveut dmandé si dj' avéns des bièsses k' end avént, paski ça s' prind des bièsses, dowê, ça. I m' aveut dné do rodje cayèt et des dzinfèctants, méns çou k' i m' aveut dné n' aveut nin stî. Ebén, c' e-s-t on vî pôve ki m' a rwèri. I m aveut dit d' mète del cène di pupe disso. (cendres de pipe)
Dj' avéns nosse vijhén ki foumeuve li pupe : ça toumeuve bin.
I savin brâmint yåk, saiss, ces vîs pôves la, dinltin.
Gn avot N.M….k' aveut on pîd tot apostoumé (enflammé). Li docteur lî aveut dit k' ele si dvreut aler fé côper l' pîd.
Gn a on vî pôve k' a passé, ki lî a dit d' èl trimper dins d' l' aiwe et do sé. C'est bon, séss, ça, di l' aiwe et do sé. Cwand dj' avins båti an 1961, dj' aveus passé so one plantche avou on clå arouni. C'est mwais, séss, ça, on clå arouni. Waite nonnonke Djan d' F…. Il èsteut adjusteû ås tchmins d' fièr ; il aveut toumé so ène cråne (robinet) di keuve et i n' s' aveut nin sognî. Ça fwêt k' il a yeu del gangrin.ne. On lî a côpé on pîd. El gangrin.ne aveut co monté. On lî aveut co dvou côper pus hôt.
Dj' aveus des sakéyes pantoufes. Il ont dvou bouxhî avou l' martea po l' aveur foû di m' pîd. Ebén, dj' a passé l' nute a trimper m' pîd dins d' l' aiwe et do sé. Et ça n' a nin gonflé. Et dji n' a ddja nin stî å docteur.
Raconté pa Aline Brôlet, li 31 d' octôbe 2001.