Après la guêre, on-z è apici toutes les fames k' avint coûtchî avu les Almands. On lz è amon.né al sucole et on lz è razé coume des ûs.
Tins dul guêre, gn avot èn oficî almand k'aveut vlu fê ène foto avu mi. Mês nosse pére n'avot nin vlu. I djot : wête ku nosse cousin k' est prîjnî a l' Almagne vinrot a tumer su la foto, i dîrot ku v' coûtchîz avu ls Almands.
- Et i nulzî ont pont fwêt d'èfants, les Almands ?
Il avint dja des capotes, don, tins dul guêre. Gn avot Poupou Berå ki nn' avot rtrouvé yène su la travûre. Dandjreu èn Almand k' avot bèroûdé ène coumére sul fûr. Et i nous l'avot vnu moustrer, a nouzôtes, toutes djon.nètes du 17-18 ans. Et i djot : c'est ène sucète et i mètot s' dèt ddins. On counichot bin l'aplåsse, don, ç' astot in saligot. Et on s'avot såvé vôye.
On-z astot inocin.nes, don, dinltins. Cand dju m' ê rvû poul prumî côp (être réglée), dj' ê sté avu ène boutiye d'êwe et ène loke ou cabinet, et dju brèyos d'awèr du sans partout. Et dju m' catchos d' nosse mére. Mês, ile m' è pris su s' chou et m' dire : Nèni, c'est toutes les fames k' ont ça. Si tu n' les auros nin, tu mourros.
Gn avot ène djon.nète a Rmitchamp ki nu lz avot nin oyu et il avot moru. Gn avot mwintes, séss, ki s' fijint mète grosses sins s' maryî; In djoû al dicåce a Bêssivô, i nn' avint bèroûdé trwâs dins les coches et in pô après, eles ratindint toutes les trwâs. I lz î djint : " Lèye tu fé, va, tu n' pus må "
Tins dul guêre, la Djètrou fijot la vîye avu l' ome du sa seûr, tins ku sn' ome astot prîjnî a l' Almagne. Dj'avos sté pou lzî dire bondjoû, pasku ç' astot co parint avou nozôtes. Et dju båke pal sère, pask' on n' mu vnot nin drovu l' uch, èt dju wès èn ome ki montot ou plantchî avu ses solés al mwin. Après, la fame m' è vnu drovu l' uch et ele tran.not come ène foye. C'est k' dj' avos vnu toker djusse ou moumint k' il astin a l'ovradje, va, dandjreu.
Raconté pa Aline Brôlet, li 21 d' måss 2002. Tous les noms ont sté tchandjés.