Û ç' qu'on z-aprète lès chîjes, a f'jant c'nuchance dès chîjeneûs…
Lu p'tit Firmin èt non.nonke Colâs
— Tènèz! quî ç' quu v'la? N'èst-ç' nin nosse pitit Firmin, ça? Qué novèles, hé, mu p'tit crolé? Qu'est-ç' qu'on z-è bin apris d' nû à scole ènut', don?
— Bin… Pou l' calcul, dj'ans tchaboré dès sôrtes du ronds, come dès niyaus, avu dès roudjes, dès vètes èt dès djaunes crôyes; pîs, dj'ans piqué dès ponts ou mitan; pîs dj'ans acramié t’tafwaît avu dès flèches. Is loumèt cès tchinis'-là dès-ansambes, come moman loume sa nouvèle cote à deûs bokèts.
— Èt co qwè d'ôte?
— À l' jèyografîye, on z-è apris la hôteûr dès grète-ciel - dès lètche-ou-stâyî come on dîrot bin - du Nèw-York; èt pîs is nous-ont moustré comint ç' qu'on r'cîjot lès batês dins l' pôrt du Yokohama.
— Èt dul vèsprêye?
— Ça, pou la l'çon d' syince, on-è causé dès-ojês qui p'lint r'djonde l'Australîye a v'nant du pôle sûd, èt l’ mwaîsse a moustré toutes lès p'tites-îles û ç' qu'is vont acouver.
— Â!
— I parait qu'on va duv'nu fwârt malins a counuche lès cayèts dud-lon. Qu'èst-ç qui v' san.ne, ô, vous, non.nonke?
— Dju n' sé nin, là, mi, m' fi; ca dju n' sé nin. Dju n' t'è diraî toudi rin, sés', mi, du pôrt du Djokmala, û yauk inlà. I gn-è pont d'avance du v'nu à l' chîje addlé mi si c'èst pou r'passer cès l'çons-là. Seûlemint, si tu 'nn' ès ause, mi, dju t' pôraî moutè bin aprinre su l' comptadje dès cwâdes du bwès, lu vicadje dès biêsses èt l’istwâre du l' vicaîrrîye dès djins d'avaurci.
— Taîs' qu'ây! Dju vôros bin, là, mi, counuche tout ça, surtout tous lès cayèts su l' bwès èt s' lès bwès. Ca, on dîrè ç' qu'on vôrè, mais c'èst quand' min.me brâmint dins lès bwès èt du bwès quu lès djins du-d-ciddé vikint, douwau?
— Jusse! Si c'èst qu'i n' tu faut qu' ça, t'ès trovu t' mwaîsse. Tu n'ès qu'à v'nu quéques djoûrs à l' chîje à nosse maujon èt t'aprêrès toutes sôrtes du cayèts qu'i gn-aurè pus nolu qui saurè lu djoû qu' tous lès parèy à mi s'ront rawiés paus fougnants. Èt i gn-è pus longtimps à ratinde, parèt.
— Taîjès-v', alèz, non.nonke! Z-astèz co fwârt come in tch'vau. Vous vikerez çant-ans, l'âdje d'in cwârbau.
— I n' pôrot nin valu! C'èst nin l' tout d'èsse fwârt, là. C'èst nin lès prun.neûs lès moreûs, di-st-i l'ome du Nûvier. Nous-ôtes, dju dîrins qu' c'èst nin lès pîlauds qu' ènn' alèt lès prèmîs. Quu ça vache come ça vut, don: dins vingt-ans du-d-ci, dju s'raî d'djà lon. Et vingt-ans, c'èst co vitemint oûte, sés'.
— Alê! Dju c'mècerans d'mwin, d'abôrd, paç'quu, ènut', dj'aî co dès d'vwârs à z-achèver.
— Pour mi, c'èst kine, taîs', mu fi. Jusqu'à d'mwin, insi!
— Ây, ô, jusqu'à! Dju m' rafîye d'djà du v'nu chîjener avu vous, là.