Ou çk' on-z apresse les schijhes, e fjhant cnoxhance des shijhneus…
— Tinoz! kî çki vla? N' est ç' nén nosse pitit Firmin, ça ? Ké noveles, hê, mu ptit crolé ? Cwè çk' on-z a ben apris d' noû e scole enute, don?
— Bén… Po l' carcul, dj' avans tchabåré des sôres di ronds, come des niyås, avou des rodjes, des vetes et des djaenès croyes; pu, dj' avans piké des ponts e mitan; pu dj' avans ecramyî ttafwåt avou des fritches. I lomèt ces tchinisse la des ansambes, come moman lome si novele cote ås deus bokets.
— Et co cwe d' ôte?
— E l' djeyografeye, on-z a-st aprins li hôteur des screpe-cir di Noû York; et pu i nos ont mostré comint çk' on rçuveut les bateas dins l' pôrt di Yokohama.
— Et del vesprêye ?
— Ça, po li lçon d' syince, on a cåzé des oujheas ki plint rdjonde l' Ostraleye a vnant du Pôle Sud, et l’ mwaisse a mostré totes les ptitès iyes ou çk' i vont acover.
— A !
— I paret k' on va divni foirt maléns a conoxhe les cayets did lon. Cwè çk i vs shonne, ô, vos, nonnonke ?
— Dji n' sai nén, la, mi, m' fi; ca dji n' sai nén. Dji n' t' è dirè todi rén, saiss, mi, do pôrt di Djokmala, u åk inla. I gn a pont d' avance di vni a l' shijhe addlé mi si c' est po rpasser ces lçons la. Seulmint, si t’ end as håsse, mi, dji t' pôrè motoit bén aprinde so l' contaedje des coides di bwès, li vicaedje des biesses et l’ istwere del vicåreye des djins d' avår ci.
— Tais' k' åy! Dji vôreu bén, la, mi, conoxhe tot ça, sortot tos les cayets so l' bwès et so les bwès. Ca, on dirè çk' on vôrè, mins c' est cwanlminme bråmint dins les bwès et do bwès ki les djins did ciddé viként, dowô ?
— Djusse ! Si c' est k' i n' ti fåt k' ça, t' as trové t' mwaisse. Ti n' as k' a vni kékes djoûs a l' shijhe e nosse måjhon et t' aprindrès totes sôres di cayets k' i gn årè pus nolu ki sårè li djoû k' toos les pareys a mi sront rawyîs pås fougnants. Et i gn a pus lontins a ratinde, paret.
— Taijhoz vs, alez, nonnonke ! Vs astoz co foirt come on tchvå. Vos vicroz cint-z ans, l' ådje d' on coirbå.
— I n' pôreut nén vali ! C' est nén l' tot d' esse foirt, la. C' est nén les pronneus les moreus, dit-st i l' ome di Nouvyî. Nozôtes, dji diréns k' c' est nén les pîlåds k' end alèt les prumîs. Ki ça våye come ça vout, don: dins vint ans did ci, dji srè ddja lon. Et vint ans, c' est co vitmint houte, saiss.
— Alez ! Dji cminçrans dmwin, dabôrd, paski, enute, dj' a co des dvwers a-z achever.
— Por mi, c' est kine, taiss, mi fi. Disca dmwin, insi !
— Åy, ô, disca ! Dji m' rafeye dedja di vni shijhner avou vos, la.