Chal èl coulêye, qwand c’èst qu’il èst neûre nut′, qu’on bê feû blame è l’êsse, dji tûze bin lon, quéqu’fèye, tot hoûtant hoûler l’ bîhe èl hayèye. Dji r’veû tant dès-afaires passer d’vant mès deûs-oûy, chal èl coulêye !
Vo-m’-ri-la p’tit valèt. Avou m’ pére, dj’ènnè va po l’ main, al campagne, vès l’ vèsprêye. C’èst may : lès-åbalowes zûnèt so l’årdispène dèl håye, tos lès tchèr’sîs sont blanc-floris, lès oûhês gruzinèt. Quéle aweûr dè viker ! Vo-m’-ri-la p’tit valèt !
Abèye, abèye è scole ! C’èst l’adje qu’on brait, qu’on coûrt, qu’on lance… In-ome !… il è-st-è djeû ! Quéle djôye ! qué disdut ! Oyez-v’ rîre ?… C’èst nos-autes qu’a wangnî ! On sone… C’èst deûr d’aprinde ! Mi couvèrte reût-a-bale ! Abèye, abèye è scole !
Mi vî pére èst rèvôye la-d’zeûr. Poqwè fåt-i qu’on moûre ? Èssonne nos-èstîs portant bin ureûs. Lès clokes !… Awè, dj’ô co sès transes. Pauve pére ! dji n’îrè pus so s’ hô tot lî d’mandant ’ne bèle fåve ! Pèrsone a rabrèssî qwand dji r’vinrè d’è scole… Å monde dji so tot seû : mi vî pére èst rèvôye la-d’zeûr !
Qwand l’ coûr èst djonne, i fåt qu’on-z-inme. Båcèle, qui v’s-èstez bèle èt frisse so l’ soû !… Volez-v’ ?… dihez-m’ ?… Qwand c’èst qu’on rèy, c’èst qu’on pinse « awè » sins l’ dîre haut… Qwand l’ coûr èst djonne, i fåt qu’on-z-inme ! [ 67 ]
Rafiya måy n’a, dit li spot. Li feume, c’èst come l’oûhê so l’ hâye : vo-l’-la so ’ne cohe, vo-l’-la so ’ne aute. On rin vis-èl fait ènêrî. Inte nos deûs c’èst d’dja tot, båcèle ! Qui c’èsteût vrêye ! Rafiya måy n’a, dit li spot.
Chal èl coulêye, qwand c’èst qu’il èst neûre nut′, qu’on bâ feû blame è l’êsse, dji tûze bin lon, quéqu’fèye, la tot hoûtant hoûler l’ bîhe èl hayèye. Dji r’veû tant dès-afaires passer d’vant mès deûs-oûy, chal èl coulêye…
Lincé-Sprimont, li nut’ di Noyé 1888.