Pådje:Henri Simon - Li pan dè bon Diu, 1935 (2e ed., recueil complet, préface et glossaire de Jean Haust).djvu/67

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.
— 65 —

Rafiya måy n’a, dit li spot. Li feume, c’èst come l’oûhê so l’ hâye : vo-l’-la so ’ne cohe, vo-l’-la so ’ne aute. On rin vis-èl fait ènêrî. Inte nos deûs c’èst d’dja tot, båcèle ! Qui c’èsteût vrêye ! Rafiya måy n’a, dit li spot.

Chal èl coulêye, qwand c’èst qu’il èst neûre nut, qu’on bâ feû blame è l’êsse, dji tûze bin lon, quéqu’fèye, la tot hoûtant hoûler l’ bîhe èl hayèye. Dji r’veû tant dès-afaires passer d’vant mès deûs-oûy, chal èl coulêye…

Lincé-Sprimont, li nut’ di Noyé 1888.


Nîvaye

Il a nîvé !

Si lon qu’on pôye vèy, li campagne èst tote blanke. Çoula s’a fait so ’ne nut, sins brut, flotche a flotche, èt vola qu’al fin tot s’a rèwalé.

Pus nole inte-deûs, pus nou hoûrlê inte lès téres, pus nou horê al dilongue dès vôyes ; lès pî-pazês sont toûrnés a consîres.

Il a nîvé !

Dispôy lès fonds dè ri disqu’al copète dè tiér, ci n’èst qu’ine blanke sitårêye qui lès bwès mahurèt d’ine tètche tote blouwisse.

Lès grands sapins, qui d’rènèt d’zos l’ nîvaye, lèyèt pinde leû bazès cohes disqu’al tére, èt lès-autes-åbes èt lès bouhons tot rîmés ont l’air d’ine fène dintèle qui monte vès l’ cîr.

Il a nîvé !

Li bê vért grain èst racovrou d’on blanc cov’teû. Qu’i djale, qu’i bîhèye, qu’i faisse si freûd qu’i vout, i va dwèrmi a houte, la-d’zos, bin påhûl’mint, tant qu’on tchaud solo vinse èl dispièrter po lî dîre qu’il èst tins dè crèhe.

Il a nîvé !

Pus nou brut d’atèlêye avå l’ viyèdje ; è vinåve, pus nou clap’tèdje di sabots so l’ pavêye. Lès djins passèt come dès