Pask’ il aveut muchyî deus tchots djwifs cotchessîs
Les Boches l’ ont ramassé et schayetmint loyî
Après on stok di plope å mitan del pasteure.
Cwand k’ on l’ a fuziyî, dj’ a veu s’ dierinne loukeure
Ene patrouye amerloche l’ aveut vnou apicî
Å fén mitan di s’ tchamp k’ i straméve å fumî
« Åy c’ est ç’ payizan la ki racsegne les Viet-Congs
C’ est tertos les pareys ; endè fåt nén ley’ onk ! »
I lyi ont plonké l’ tiesse dins l’ niche aiwe do brôlî
Li rsaetchant foû pa côps, po fé durer l’ plaijhi.
Divant k’ i n’ dihotaxhe el flåwe clårté d’ l’ aireur,
Divant k’ i n’ rindaxhe l’ åme, dj’ a veu s’ dierinne loukeure.
Si seul toirt, ci fourit d’ aler souner a messe
Dabôrd k’ a Betleyem, les Djwifs saetchént timpesse
So tot çki s’ aprepyive del båzlike do Noyé,
La k’ des Palestinîs s’ î avént rassåvé.
Li rodje sonk sol tårmak prinda ene noere coleur
Divant k’ i n’ cloye ses ouys, dj’ a veu s’ dierinne loukeure.
Aléve moenner ds ecråxhes amon les ptits cinsîs
Avou s’ vî camion-bene, tanflant ezès gripetes.
I s’ aveut-st anuti
Cåze d’ ene pane a l’ aessi.
Les Barbares l’ ont saetchî, tot ploncant do stoelî
Di leu-z elicoptere, come on tire ene robete.
« C’ est seur des åres tchimikes k’ i tchereye dins l’ noereur ! »
Li moumint k’ i passa, dj’ voeya s’ dierinne loukeure.
Cwè m’ volîz vs acsegnî, vos, mårtirs di mes sondjes ?
Dji vs aschoûte ; gn aveut åk ki disk’ asteure mi rondje
Dins vos dierins loucas,
Dins vos dierins rwaitas.
« Tchoûler, braire et pîler : totès faitindjes di låtches !
Fwai tes bouyes sins rnicter ; adonpwis, boute å lådje !
Péyî, teguer, djéryî : end åress dipus d’ åjhe,
Cwand sofrixhant, rålant, ti srès a t’ dierinne båye ?
Ti taijhance, tes bôreas, ele les frè tronner d’ peu,
Et s’ såront i k’ tes frés seront sfwaitmint bateus
Po hagnî les spotcheus,
Po disteler leu djeu. »
Eplaidî avou on ptit motlî cial so l’ Aberteke.