Les cwacwas d’ l’ Istwere
1) Douvént k’ les otos avént dandjî d’ on passe-avant e moes d’ decimbe 1956 ? 2) Et tos des noers drapeas ås fniesses avou ene porcession a Dinant (1905-1913) ? 3) Pocwè li çmintire avou 600 efuyîs bedjes e l’ France tins del guere di 14 a-t i divnou on paxhi ?
Dj’ a bråmint d’ l’ agrè po l’ istwere. Et rnaxhî tofer dins les vîs papîs del famile.
Dins ene sacotche da nosse mame, dji rtrouve on djoû ci papî cial :
E 1956, dj’ a manké d’ leyî mes hozetes a cåze d’ on forsonnaedje [hémorragie profuse], ki dj’ m’ aveu côpé ene voenne a m’ gåtche bresse. Po rivni d’ l’ ospitå, di Rotchfoirt a Djmele, li docteur m’ aveut fwait ci papî la ki dit : « Dji dmande ås Otorités di leyî passer l’ oto k’ el ramoenne. » Portant ci n’ esteut nén ene des « crijhe do petrole » (1975-1977). Adon ? Po sawè cwè, fårè bén lére mi live « Contes a rlaye » ki vént d’ vini foû.
So des fotos d’ porcession a Dinant, on voet bråmint des noers drapeas ås fniesses. Les fotos ni sont nén datêyes, mins on les pout avirer d’ inte 1905 et 1913. Dabôrd, ça n’ pout nén esse po les moirts touwés pås Almands e moes d’ awousse 1914. On a trové li minme sôre di noers drapeas so des fotos d’ porcession a Tornè [Tournai]. Adon, ça n’ est nén ene sacwè rastrindowe a Dinant.
Response atåvlêye ås scoles di Bive : Les noers drapeas, ci sereut cobén po poirter l’ doû [deuil] pol moirt da Yopôl II. Les fotos serént adon datåves di decimbe 1909 ou puvite may 1910.
C’ est l’ istwere des 350.000 Bedjes k’ ont corou evoye al guere di 14. Bråmint did zels s’ ont rtrové dins l’ Pas-d’-Calès. End aveut a pô près 5.000 di raploûs a Chartreuse de Neuville. C’ est ene abeye di l’ ôre des Tchåtrous [Chartreux], basteye e 1314.
Il î ont dmoré dispoy 1915 disca 1919. Totes ces djins la estént nåjheyes u crokêyes. Ele divént esse sogneyes. Ça fwait : li Tchåtreuse a divnou li pus grand ospitau bedje d’ Urope po les civils.
I gn aveut a pô près 700 léts et 600 djins î ont morou, cåze do tifusse et del gripe espagnole. On moumint, i gn aveut télmint des moirts k’ on les eteréve a deus onk so l’ ôte ! Les fosses estént dins ene grande waide metowe astok. On-z î aveut djusse planté ene croes dvant l’ intrêye. Mins dispu les anéyes 50, on n’ voet pus rén del cimintire. N’ a pus k’ ene pasteure avou des biesses. Va-z è vey douvént ?
prezinté aprume ås scoles di Bive, e 2022 et 2023