Dispû si lontimps qu'on z'è cause,
Li djoû est tot l'minme arrivé.
Li moman n'est nin à l' dicausse,
C'est l'prumî côp qu'Djan l'va quitter.
Mins i faut bén qu'on l'mète è scole,
Vol'la div'nu in grand gârçon.
Mi qu'vèyais si èvi l'gayole,
Dji m' fais mau d 'rèssèrer m'pénson.
Po l' momint, li p'tit est fwârt guéye,
C'est do candj'mint, c'est do novia;
Nos vièrans d'vant l'coron d'l'anéye
S'i n' traitrè nén l' maisse di boûria.
Allez, Djandjan, v'là l'heûre qui sone,
Rabrèssîz rad'mint vosse moman.
Ouf! li clapant bètch qu'elle lî done,
C'est s'cœûr qu'elle mèt su l'front d' l'èfant.
N' n'avans d'djà fait in bokè d'vôye
Qui l'vint nos apwate co des mots :
… Nén fé li p'tit sauvadje … ârvôye
… fé awè tchôd … nén couru d'trop …
Mins Djan est bén trop en fafouye
Po piède si timps à s'ritoûrner ;
I n'wèt nén s'mére qui r'frote ses ouys
Et r'soûwe des lârmes avou s' céndré.
Tote ène Vîye (CW1940)/XXI
21
Tote ène Vîye, Les Cahiers Wallons lº 32,
È scole