Djèl wè si voltîye li vî tchmén !
Eture les-ayes i caracole,
Sautèle li ri oute do molén ;
Comme les èfants qui vont è scole,
I prind l'longue vôy po-z-ariver.
Addé l'bwès i s'amûse ène miète
A z-y ètinde li vint tchanter,
Pwîs po r'gangnî l'timps qu'i vént d'piède,
I fait l' cénk qui coûrt bon-z-èt rwèd
Comme po yesse prèmî al valéye
Addé ène rindgîye di blancs-bwès
Et s'y rpwaser d'vant l'grande montéye …
Li grande montéye qui n'mwinne nule pau !
C'est po ça qu' djel wès si voltîye:
Pacequ'i n' va nén al ville, lauvau,
Qu'il inme mia sûre si fantaisîye,
Ni sièrvu qu'à saqwans vîs tchaûrs,
Sins conèche autos et poussères ;
Dins les grands bouquets di dgnesses d' ôr
Et au pîd des maûvès brouwêres
Achèver s'coûse tot paujèremint
En mwinmant l'poéte qu'el vout sûre,
Oû qu' les sondjes bêrcéyenut doûcemint
Li cén qui s'a lèyî codûre.
Eture ses-ayes èt ses bouchons
Floris d'blankès spènes et d'sucètes,
Les galants avou leûs mayons
Vègnenut coude … des bètches à picètes …
Come li vî tchmén, sins trop sawèt
Si c'est po d'bon qu'is sont-st-en route
Ni jusqu'à oû qu'ça les mwinnerè
Les doûcès fleûrs qu'is vègnenut coude.
Tote ène Vîye (CW1940)/VIII
8
Tote ène Vîye, Les Cahiers Wallons lº 32,
Li vî tchmén