C'est l' grand daladje al cinse ; l'aousse va comincî,
Les picteûs sont riv'nus, avou leû z-air bounasse,
Leûs gros chabots d' flaminds, leû céle èt leû bèsace,
Et leûs pèsants djurons qu'les gamins vont séndjî.
Sus l'vôye, on s'arètrè po les-ôre ramadjî
Curieux comme s'il èsténn't vraimint dgins d'ène aute race
Avou leûs laudjès spales et leus blondès tignasses.
Ou les invîye ène miète pasqu'il ont voyadjî.
Li dimègne is dmeûr'nut au pus sovint inte zèls,
Et s'il ont d'astchèyance attrapé l'boune dringuèle,
C'est-al jatte qu'is bwèront sakwants lites di pèkèt.
Adon, à grands côps d'gueuye, is djureront comme des Scotches
Et c'est-in cop d'mille ans si tot n'toûne nén d'truviès
Et qu'on n'si man'cîye nén di s'trawer à cops d'fotche.
Li lèdmwoin les galiârds si lèvront d'vant l'solia,
Camarâdes comme divant èt stokasses à l'ovradje,
Presses à s'aidî yin l'aute, sins s'sov'nu des messadjes
Qu'èls-ènondènn't ayîr, pîre qui des djonnes cokias.
Dins l'campagne on-z-aligne des drigléyes di dîjas,
Mwints steûles sont coagnîyes pau-z-è prèmis tcherwadjes
Et des mwéyes ratindenut qu'on-z-ataque li batadje,
Timps qui l'gorlî s'èchine à r'parer des flayas.
Cit'ci vout ène noûve tchope et cit'là ène batère,
L'ovrî satche li tchiètia en choûtant les istwères
Do storné d'apurdice qui comache tos l'z-ostis.
Les ârsouyes do viladje qui vègnenut dins l'boutique
Volenut, por zels sucî, des gros bokèts d'aurpi …
Mi ossi, djèl dwès dîre, dj' a stî ène bourre pratique.
Li tchèron a stî coude dins l'aye in grand coucha
Tot rintèrerè sins ploufe ; i faurè planter l'méye,
Quand li vaurlet stampé al copète del tchèréye
Arè fé d'ètassî l'ôr do dérén dîja.
Por audjoûrdu l'cinsî léye dwârmu ses tracas :
Dins l'mafe comme sus l'anbô, tote li grègne est bouréye,
Dilé l'uche del maujo, achî d' sus les montéyes,
I choûte li p'tit vatchî djouwer d'l'ârmonica.
Sus ç'timps là, èl cujène, li cinseresse dresse li tauve
Et z'aprèstéye li crinme èt l' farène po les aufes.
Elle ni pout mau d'tchicter po l'bûre ni po les ous,
Nén pus qui l'maisse, t't'aleûre, ni plaindrait les botèyes:
Do pékèt et do France, gn'arè po tos les gouts …
Pwîs les vaurlets dans'ront avou les djonnès fèyes.
Tote ène Vîye (CW1940)/V
L'aousse