Aclevaedjes a môde did dinltins
Dins l’ Rantoele 88, dj’ avéns veyou totès paskeyes ki l’ Alfrede Wanlin aveut cnoxhou avou l’ coshlaedje di ses troyes. Mins divant d’ coshler, elzès fåt moenner å måye.
Li Rantoele (L.R.) : Kibén d’ côps k’ ele coshlèt ?
Alfred Wanlin (A.W.) : Deus côps so l’ anêye. So tote leu veye, cénk shijh set coshlaedjes, va, dandjreus. Li troye va a måye
L.R. - Kimint çk’ on voet k’ ene troye va a måye ?
A.W. - Ele moennèt la viye, hin ! Oyayay, twè !
On côp, li feme va po les sognî, et ele ni saveut nén k’ ele aléve a måye. On côp k’ l’ ouxh a stî craeylé, li troye mousse foû et ele lyi passe dins les djambes – ene grande troye come ça. Et vo l’ la sol dos del troye. Et leye criyî a mwin « Djôzef ! » « Wou çki t’ vas? » « Dimande lu al troye ! »
L.R. - Et vs avîz l’ veråt da vosse ?
A.W. - Nozôtes, åy ! Mins m’ bea-pere, metans, i nd aveut pont, adon. Gn aveut ddja waire ki nd avént, hin, des veråts. Adon, on nd a atchté onk, po-z esse trankile. Dj’ aveu atchté on pîtrin.
L.R. - Gn aveut ds ôtes djins k’ î amoennént leu troye ?
A.W. - Non.
L.R. - I n’ esteut nén trop metchant ?
A.W. - Non.
L.R. - Adon, li troye va a måye et vs avoz l’ godi; vos les laixhîz dins on tchamp u dins l’ ran d’ coshets ?
A.W. - Les deus vont, hin. Ele si laixhrè siervi dins l’ pasteure ossu bén k’ dins l’ ran.
L.R. - Vos dmorez la po waitî kimint k’ ça va ? On gayet, c’ est deus sgondes. I potche, i låtche si smince, et pu i dischind. Et on veråt ?
A.W. - On veråt, il arive dilé l’ oraye del troye, et i lyi tchafeye a l’ oraye. Et pu, il erva, et pu i rvént. Co todi parey : i lyi rtchafeye a l’ oraye. Por mi, i voet k’ ele ni comprind nén – dji n’ sai nén, mi. Adon, il eva padrî; i sôrtixh li croyon, et i lyi creuze les fesses.
L.R. - Et i dmeure lontins ?
Julie Leboutte (J.L.) - Dijh munites; bounmint dijh munutes.
L.R. - Et côper les coshets ?
A.W. - Abén, a cwénze saze kilos, hin. On fjheut ça nos deus l’ feme.
J.L. - I s’ ashieut dsu ene tchereye, et i les meteut inte ses deus djambes. Et pu on aveut on ptit coutea esprès, hin.
A.W. - Hop ! on ptit côp a tchaeke… pårteye, mafwè, hin. On ridnéve on ptit côp d’ coutea, ubén ça s’ schiréve tot seu. Et pu on dzinfectéve on ptit pô. Et pu, evoye, hin !
L.R. - Djamåy pont raté ? Des cis k’ estént avou des rompeures e l' ayinne ?
J.L. - Non. Po ça, ça a stî.
Racontaedje da Julie Leboutte (avou Alfred Wanlin) ås Scoles di Bive (scoles pa les scolîs) li 30 d' octôbe 2018.