T’ agrinze nén, valet, t’ agrinze nén.
Ti bon vî tins ni rvénrè nén.
L’ tins des longuès chîjes ås côpons
Ki Bon-pa conteut s’ les nûtons.
T’ agrinze nén, bwêcèle, t’ agrinze nén
L’ pôve lêd vî tins n’ rivénrè nén
Li tins des blamêyes o feû d’ bwès
K’ t’ aveus sogne del Mariye Crotchet.
Ti bon vî tins, il est bin vôye:
Les ptitès tayes a volant d’ sôye;
Les porcessions, les rogåcions,
Li gasse po les cofirmåcions.
Çu k’ est bin vôye ni rvénrè måy.
C’ est nén come les såvadjès åwes,
Les tchacresses et les awoustrèces,
Les cwâkrês èt les rinnes côrrèces.
Çu ki n’ rivénrè måy est hoûte;
Tel fåt rovyî, fåt passer hoûte;
Gn è grand dandjî, il est grand tins,
Nosse bon djonne tins, fåt croxhî ddins.
Nosse bê djonne tins, fåt croxhî ddins;
Fåt goler dvins a grossès dints.
Tins des longuès chîjes o dancing,
Des diss-djokès et do mixing.
Li bê djonne tins, t’ î gangnes ti pwin;
Fåt pougnî dvins a plinnès mwins.
Cabin k’ to sros co o pwintadje,
To mougnes do bûre èt do frumadje
Fåt k’ to l’ aspougnes, fåt k’ to l’ abresses;
Djower avu les copiutrèces;
Prinde des imådjes al sican’rèce;
Vey les fåtes al ricoridjrèce.
Si to l’ abresses tot åddilong,
T’ î pus co cåzer e walon
Do blantchichmint des neurès çansses,
Des efants k’ on lzî fwêt violance.
Sicrît li 15 di decimbe 1996.