T’ agrinci nén, valet, t’ agrinci nén.
Ti bon vî tins ni rvénrè nén.
L’ tins des longuès shijhes ås côpons
Ki Bon-pa contéve so les nûtons.
T’ agrinci nén, båshele, t’ agrinci nén
L’ pôve laid vî tins n’ rivénrè nén
Li tins des blamêyes å feu d’ bwès
K’ t’ aveus sogne del Mareye Crotchet.
Ti bon vî tins est bén evoye:
Les ptitès taeyes a volant d’ soye;
Les porcessions, les rogåcions,
Li gasse po les cofirmåcions.
Çou k’ est evoye ni rvénrè måy.
C’ est nén come les såvadjès åwes,
Les tchacresses et les awoustreces,
Les cwåkrês et les rinnes côrreces.
Çou ki n’ rivénrè måy est houte;
T’ el fåt rovyî, t’ fåt passer houte;
Gn a grand dandjî, il est grand tins,
Nosse bon djonne tins, fåt croxhî ddins.
Nosse bea djonne tins, fåt croxhî ddins;
Fåt goler dvins, ey a gros dints.
L’ tins des longuès shijhes e dancigne,
Des diss-djokès et do micsigne.
Li bea djonne tins, t’ î wangnes ti pwin;
Fåt pougnî dvins a plinnès mwins.
Cabén k’ to sreus co e poentaedje,
To magnes do boure et do froumadje
Fåt k’ to l’ aspougnes, fåt k’ to l’ abresses;
Djouwer avou les copiutreces;
Prinde des imådjes al sicanrece;
Vey les fåtes al ricoridjrece.
Si to l’ abresses tot åd dilong,
T’ î pous co cåzer e walon
Do blankixhmint des noerès çanses,
Des efants k’ on lzî fwait violance.
T’ agranci nén
T’ agranci nén
1996 (mwaisse) / 2022 (rifondou maweur)
T’ agrinci nén