Les sov’nances : ça fait todë dès maus, pa d’zeû tot, lès mèyeûses.
Djë l’a razouyi on momint, roter bén drwète dins l’ pisinte en sondjant à l’ prëmi côp quë dj’ l’avo vèyë, vaicë, èwou ç’ quë nos èstin’ vënë coude dès passe-rôses. Trente ans d’ pièrdë : onk po l’ôte !…
Portant ça s’avot së bén ayinci !…
Lë Phil, më copin d’ vwèsén, one miète pës vi qu’ më, comincive à courë lès guéguètes. Ë m’avot dët : « Lë samin.ne passéye dj’a sti à l’ fièsse à Djodogne, lès tërs aus pëpes, lès autos-scôtèrs, èt l’ ponton al viole dè l’ Touri. Dj’i a fait conèchance avou tote one famële dè l’ Brouwêre : cénq crapôtes avou leû mame. Èt të m’ pous crwère, c’est dès danseûses, sés’ ! On s’a promètë d’ së r’veûy lë samin.ne quë vént. Èlle iront s’ pormin.ner së l’ vôye yinte lë Bouwêre èt l’ bwès d’ Wayindje, dimègne àprès prandjêre. Të vairès avou më : tot seû po lès cénqs, c’èst one miyète trop fwârt por më ! ».
Dj’aléve à scole adlé lès fréres à Djodogne: seize ans èt dès pouchêres. Èt ni question d’aler courë lès vôyes : po lès pârints, faléve sëtëdi, èt co doner, on côp d’ mwin à l’ cinse. Portant ç’ dimègne là, nos avons prins nosse vélo d’ cousse èt chorer au pës rwèd pas lès vôyes dë campagne. On lès-a vèyë d’on lon, dëschin.de lë pavéye avou l’ pës djon.ne qu’avot dè mau à lès sûre. Lë mame l’avot priyi dè rawaiti à sès grandès sous, d’asard ! Èt, nos deûs, pèser come pës dèr së les pèdales po arëver pës rade, po lès r’trover. Lë Phil a tapé s’vélo sër on bouchon, èt cominci à lès rabrèssi tortotes one après l’ôte, min.me lë gamëne. « Maria, Marie, Monique, Marcèle èt Micheline… Ça, c’èst m’ copin : Jacky ». Më, djë d’mèrévé la, astampé, on vrai pëquèt d’ cwane, bauyau come on moya, djë n’ vèyéve quë… comint avot-t-ë co dët ?… Marcèle ! Djë sintéve më keûr bouchi dins më stoumak… lë cousse à vélo ?… lë tchaleûr ?… Non.na, djë n’ vèyéve pës qu’ lèye ! L’alëmwère m’avot djondë ! « Qwè ?, të n’ès ni bén ? të véns avou nos ou të d’meûre là ? ». Lë Phil vënéve dë m’ dëspièrter. Nos avant mouchi pa d’zo lès-aubes, courë autou dès bouchons po rascoude lès fleûrs. Dj’ètindéve criyi todë au pës lon. Nos nos stramîn’ à bachète së tote lë stindéye, èt, tot d’on côp, paf, më tièsse ; èlle èstot là, pa-d’vant më, au pid d’on tchin.ne. On s’a achi së lès racënes, s’ razouyi sins rén dire… Èlla a findë sès lèpes, dj’a seûr dë fé l’ min.me, djë n’ m’è sovén pës. Dj’a stindë m’ mwins, prinde lë cëne qu’a v’në tot seûle, sins-one dote. Nos nos avans r’lèvé, dj’a wasë l’ prinde pas l’ taye, èt l’ sèré dins mès brès, a lë spotchi së më stoumak. Dj’a sintë s’ pwètrëne aclapéye à l’ ménk. Djë sintéve lë boune odeûr de sès tch’vias tot r’nètis, lë sin.bon d’ djasmén spaurdë autou d’ sès spales. Djë sintéve së keûr bardouchi avou l’ ménk së l’ min.me mèsère. C’èstot trop novia por më, c’ènn’èstot d’ trop ! Lë bètch a monté come one lëmire dë d’dins l’ fond d’ më stoumak. Quand nos lin.wes ont d’mèré djondouwes, dj’a co r’sintë l’ min.me drëne qu’aunawaire dins tot m’ cwârp. Èlle s’a r’satchi, tanflante, fou d’alin.ne. On n’avot ni co dët on mot ! Dj’a prins më p’tët coutia dins m’ potche, tayi on keûr dins lë scwace, i scrire më nom, jës’ à trwès-quart. Ça n’a ni taurdji : èle m’a stindë s’ mwins, po r’çûre lë coutia, èt tayi l’ cénk, pa-pad’zo, ossë rwèd, sins r’nicter ! Lès mouchons n’ tchip’lîn’ pës dins lès-aubes, on n’ètindéve pës rén. Nos n’èstîn’ pës qu’ nos deûs. Èle m’a prins pa l’ brès èt m’ min.ner jësqu’à l’ètang one miète pës bas. Nos i avans trimpé nos mwins, comachi nos dwègts dins l’ aiwe quë rëch’léve dè l’ trop plin… One pire, tapéye d’au lon a v’në nos spëter en tchaîyant dins l’ sourdant : « Èt qwè vos deûs ? Vos n’avoz co rén coudë ? Lë solia bache, va yèsse timps dè raler ! »…
Comint avans-n’ rintré ? Djë n’ saro pës vos l’ dire, ça m’a choné së coût. Djë rotéve dins sès pas a boune sëtindéye, come sër-on lairdjè. Lès-ôtes ont cominci à m’ bal’ter, mins djë n’ lès choutéve ni. Djë n’ vèyéve pës quë l’ doûceûr dins sès ouy chaque côp qu’èle tournéve së tièsse po m’ rawaiti…
Dj’avo r’baqué à l’ cinse quë l’ nait èstot d’dja tchaite, en rasant lès mërayes : drovë l’ baurire en sayant dë n’ fé pont d’ brut. Mins, lë pègnon yëte : bardaf, dj’a atrapé on r’tour de brès en plin.ne massale ! Maman m’ ratindéve ! « Çèst a c’t-eure-cë quë t’ rintëre ? Fénèyant ! Èwou a-s’ sëti bèrôler, c’èstot t’ tour cë dimègne-cë, po nos doner on côp d’ mwin, èt papa a dë fé l’ovradje tot seû ! ». « Bén !… on a sti fé on tour à vélo avou l’ Phil, dj’a rovi l’eûre, djë n’a pës sondji qu’ c’èstot m’ dimègne à bouter ! ». « On tour, on tour ! A yut eure, të sôrtéves d’one maujone à l’ Brouwère. Dj’èl conè, më, ç’ maujone là ! Avou cénq crapôtes quë n’ont pont d’ pére, èt l’ mame qu’èst tot seûle ! Djë n’ vou pës quë t’ mèyes on pid par là, a-s’ comprins ? A seize ans, courë lès coméres ! T’as co bén l’ timps po tot ça ! A-s’ rovi tès scoles ! Èt après, ë faurè co quë t’ faiyes të timps d’ soudar !… Rintëre rademint, quë l’ pére në t’vwèye… ».
Dj’avo rovi quë l’ famële da papa prov’néve dè l’ Brouwêre, èt quë sès couséns d’mèrîn’ causë dins l’ min.me vôye. Djë m’a dët quë l’ samin.ne d’après, djë pëdro dès cotoûrs po n’ pës yèsse véyë !
Lë londë, po cénq-eures, dj’èsto së pid. Dj’a sti doné on côp d’ mwin à papa po sougni lès bièssses èt mode lès vatches. Ë n’a dët on mot së l’ djou dë d’vant. On a bouté sins motë. Timps in timps, djë li tapéve on côp d’ouy à catchète, èt djë vèyéve sès lèpes quë së r’trossîn’ èt plin dë stwèles dins sès-oûy. Aviès yut eûres, on-n-a étindë l’ crameuse quë yûléve dins l’ place quë nos sièrvéve dë laiterîye : Maman èstot d’djà à l’ovradje èto. « Rote të r’laver, gamin, dëdjëne èt va à scole, s’ë faut, on n’è r’causerè pës taurd ». Ça a sti lès seûlès paroles dë m’ pa po ç’ djournéye là ! Qwè faléve-t-ë quë dj’è rastègne ?…
…
Saint Albert, prëmëne eûre dë stëde, cénqyin.me grèço-latëne : ‘poésie’, francès, avou l’ pére Binamé : Binam’ qu’on l’avot spoté. Dj’èl vèyéve volti, c’èst lë quë m’avot drovë lès ouy së tote one chîléye dë scrîjeûs : Arthur Masson avou Twène Culot, Thanasse èt Casimir, Pierre Boule, Simenon, Maurice Carême, et tot lès Francès, quë dj’ përdéve dè plaijë à lès lire. C’èstot l’ min.me djë avou l’ latén èt l’ grèc : Eschyle, Sophocle, Ovide, Pline èt co tot l’s-ôtes. Co sovint, a l’ place dë cë quë d’véve nos-aprinde, ë përdéve on live, èt nos lire dès passadjes. Lë lèd’dëmwin, dj’avo l’ tièsse dins l’ live, èt n’ pës l’ lachi, min.me s’ë faléve passer l’ nait d’së !
Après l’ pâtèr d’abëtëde, vola quë comincîve lë djournéye pa : « Vos m’alez s’crîre vosse dimègne, sër-one cope dë pages, ni d’ pës. Ni dandji dë m’ raconter quë vos-avoz sti à mèsse po vos fé bén veûy, djë n’ vos crwèrè ni. Waiti qu’ça fëche, sins faute, èt m’ mostrer tot ç’ quë dj’ vos-a aprins dëspôy lë mwès sètimbe. Vos avoz deûs-eûres pa d’vant vos ! ».
Clawé së m’ tchèyère quë dj’èsto ! Tot m’ dimègne à r’passé dins m’ tièsse sër-on nëk dë fëstë : Marcèle, l’alëmwêre, lès passe-rôses, nos’ prëmi bètch, nos’ tchin.ne, tot ç’quë dj’avo r’sintë, èt quë djë r’sintéve co courë dins m’ song. Comint raconter tot ça, èt à on këré co bén ! C’èstot pîre quë d’aler à cofèsse ! Comint faléve-t-ë fé ? Dj’ètindéve totes lès plëmes grèter së l’ papi. Binam passéve yinte lès bancs, ë m’a rawaiti : « Ça n’ vos va ni fwârt, dirot-on ? Vos-èstos blanc-mwârt, vosse dimègne a sti së dèr quë ça ? Sondjiz one miyète à tot ç’ quë dj’ vos-a aprins c’t-anéye cë, èt quë vos vèyoz volti. Vos vwèroz ça va sôrtë tot seû ! »…
Dins m’ tièsse, dj’a étindë… Chimène…, Roméo èt Juliète…, Maman, Papa…, mes fréres…, Marcèle … !
Lë plëme a spëté dins mwins èt courë së l’ papi, djë n’ savo pës l’ rasténre :
Veûy Volti !
C’èst l’alëmwêre que tchait së vosse tièsse,
Lès-ôtes quë v’ pëd’nèt por one bièsse,
C’est vosse prëmëne carèsse.
On n’ raconte ni s’ bouneûr
C’èst së flauw,
C’èst së tène !
Ë faut soyë lë r’conèche,
L’apëci quand ë passe.
On n’ raconte ni s’ bouneûr…
Dj’èl l’ lirè dins sès-ouy…
Lë vint sofèle,
Lë plaive tchait,
T’as bachi tès volets
Lë tchèt s’a èdârmë au këlot
Astoke dë lë stuve quë ronkîye.
Èt twè, më t’nant pas l’ mwin,
Të m’ cause dè veûy volti !
Djë l’a li dins tès-ouy !
Veûy volti,
C’èst rovi s’ nom d’ famële
Në sondji qu’ a së p’tët nom
Quand on done, c’èst sins condëtion !
C’èst dire oy’, quand vosse cwârp dët non,
C’èst rovi sès-ambëtions, në sondji qu’a lèye,
Qu’a yèsse bon.
C’èst caressi sès tch’fias
Lë rabrèssi së s’ front
Së continter d’one carèsse,
Adon qu’on ratind one promèsse.
C’èst tode ténre së mwins,
Min.me quand tos lès toûrmints,
Vairont frèchë sès-oûy.
C’èst byin pës grand quand on s’ done,
S’ on a fait mau, faut qu’on pardone,
Veûy volti, ça met dès gotes dins vos-oûy.
C’èst së r’ssatchi po l’ cëne qu’on vwè volti,
Waiti d’ l’aidi dins sès mëséres,
Yèsse todë là a sès costés.
C’èst li dire lë vèrëté,
Min.me së sès oûy dëvën’nèt frèches.
On djou, èle vos dirè : mèrcë !
C’èst aprèster së p’tët d’jëné,
Sès bouwéyes èt s’ diné,
Tot ça, sins jamais rén li d’mander.
Todë yèsse à sès costés,
Po n’è fé qu’onk, faut yèsse à deûs.
Veûy volti, c’èst quand on s’ done.
Po n’è fé qu’onk, faut yèsse à deûs !…
Tot ç’ quë dj’avo dins m’ tièsse, tote më famële, tote mès scoles, èt… Marcèle, èt, tot ç’ quë djë n’avo ni soyë li dire ayir !
Dj’a yë fënë onk dès prëmis…
Binam à ramassé lès fouyes. On ‘nn’a pës jamais r’causé ! Quate mwès pës taurd, dj’a fait l’ saut en « rhétorique ».
Maman lèye, éle m’avot mètë aus scoles à Sint-Albert, avou l’ ëdéye quë djë m’aro yë fait këré. Mins vola : n’avot Marcèle. Djë n’ l’aro ni soyë r’ssatchi dë m’ tièsse. Dj’èsto së dès tchôdès bréjes, todë pës ardent po aller lë r’trover. Tant quë dj’ fiéve bén l’ovradje à l’ maujone, n’avot rén d’assotëchant. È l’ samin.ne, djë trovéve todë bén one cous’ à fé po pèter èvôye, èt nos crwèjeler timpe ou taurd. Lë dimègne, avou l’ Phil, nos-alîn’ veuy one cous’ à vélo : èlle èstot là. Së djë djouwéve au fotbal : èlle èstot co là. Nos r’passîn’ à l’ Brouwêre, dins on cabarèt « Aus chîs fèsses », mète one pîce dins l’ djoukbox, èt, nos cocheûre së lès rock èn’ rol, èt lès tangos d’a Èlvis’, da Fats Domino, da Jerry Lee Léwis’, dès-aîrs dë mësëques que bardouchîyenèt co à mès-orâyes lë djou d’andjoûrdë. Èt, po danser, djë vos garantë quë nos-alîn’ bén èchones. N’avot ni one cope po nos bate. Nos-avîn’ vèyë comint fé au cinéma : c’èstot fén parèy’. Djè l’ savo fé monter è l’air, passer yinte mès djambes dins one ascauchîye, èt lë r’çûre come ë faut. Djè l’ savo clinci dins mès brès, lë t’nant pa l’ taye sins piède lë mësëque. On-èstot jamais a coût d’alin.ne. Djè l’ ramin.néve jësqu’à s’ maujone sins fé dès lètcherïyes, ça : nos nos lès t’nîn’ po quand nos n’èstîn’ pë qu’ nos deûs…
Mins là, à l’ Noyé, dj’avo r’tchai d’ dîs places à scole. Së l’ mame da Marcèle në trovéve rén à dîre : éle vèyéve bén dj’èstos one éfant bén èlèvé. À l’ cinse, lë tchèt èstot dins lès poyes ! Maman dèbobënéve sès prétchadjes : « Tès scoles…, tès-ovradjes…, të timps d’ soudâr…T’as co bén l’ timps… Ç’èst ni one famële come lë nosse…Ç’èst ni one crapôte por twè…Èlle èst deûs-ans pë vîye quë twè èt, à c’t-adje là, c’èst d’dja one fème, èle travaye dëdja, èt, twè, të n’es co qu’on gamin …, èt co…èt co… ! ».
Èt më, djë m’ rècrèstéve : « Papa, lë, n’a ni sti à scole po yèsse cinsi !…, Djë n’irè pës à scole…, Djë va ravancë m’ timps d’ soudâr…, dj’irè travayi… ! ».
D’après l’ novèle an, ça n’a pës sti l’ min.me èmantchûre. Pës quèstion dè courë lès vôyes, djë n’avoz pës quë m’ dimègne po-z-aler djouwer au fotbal. Lë mèyeû dès plans po aler carèssi, djë l’avo èmantchi avou noste ètrin.neû, : ë m’ fiéve sôrtë d’ l’èquëpe à l’ mëtan. Dîs mënëtes pës taûrd, tièsse au guëdon, djë couréve rademint r’trover m’ comére. On quart d’eûre volé par cë, one demèye eûre voléye par là, po nos dire qu’on s’ vèyéve volti. Èt pwis, rademint sauteler së lès pèdales. Dj’èsto a pin.ne rëtchait à l’ passète, quë mès pârints savîn’ bén èwou ç’ quë dj’avo sti bèrôler : èt avou qui ! Lès canlètes avîn’ tossë. On djou, nos-èstîn’ au cinéma à l’ Brouwêre : djë m’è sovén come d’ayir ; one bièstrîye d’ëstwêre avou Mario Lan’za : l’ëch s’a tapé au laudje. Maman s’a avancë, më prinde pa l’ casake, më raûyi fou dès brès da Marcèle èt m’ trin.ner à l’ëch pa d’vant totes lès djins.
Nos arîn’ bén yë mouchi dins-on trau d’ sorës. Quëne afront po Marcèle !
Fén dè l’ samin.ne, après st-ovradje lë Phil a-st-arëvé à l’ maujone, èt, à catchète, ë m’a stindë one lète :
« Më Bënamé Jacky, »
« Dj’a bén tuzé à nos deûs. Më ossë, dins m’ famële, on m’ copëte po quë dj’ vos laîye achèver vos scoles et vosse timps d’ soudâr. Djë sé bén qu’ ça n’ vos rapaujîyeré ni, mins ë m’ chone quë nos n’ dëvrîn’ pës nos r’veûy, èt d’meûrer camarade come dëvant. Së ça dwèt toûrner come ça, ostant asteûre quë trop taurd. Djë n’ vos rovîyerè jamais. »…
Dj’aro volë ièsse dins one maujone sins fënièsse. À m’ foute më tièsse à l’ mërâye. Au fén fond dë m’ cwârp, dj’a sintë l’ fëlé quë r’lôn.yîve më keûr à m’ cèrvia, ènn’aller à flëgote : po todë ! On m’avot prind cë qu’ dj’avo d’ pës bia, cë qu’ dj’avo d’ mèyeû. Dj’a monté dins m’ tchambe come on pièrdë. Djë n’ m’a soyë ragrawyi qu’en mètant së papi tot ç’ quë dj’avo dins m’ cwârp, po sayi on dairén côp dè r’veûy Marcèle.
« Pëtët keûr, »
« Phil vént dë më r’mète vosse lète. Djë brai lès-oûy fou dë m’ tièsse à l’ lîre èt à l’ rëlîre. Cë qu’ vos më d’mandez la, c’èst-st-au d’zeû d’ mès fwaces. Quand nos nos avans rèscontré l’ prëmi côp, djë n’ poléve mau dès sondji à l’ place quë vos-aliz prinde dins m’ keûr. Bén-astchaiyë, vos l’ rimplëchoz à vos tote seûle. Vos n’ ploz ni conèche tot ç’ quë vos m’avoz apwarté, èt quë vos më r’ssatchi aujourdë. C’èst grace a vos qu’ dj’a aprins à vëker, min.me s’ë nos faléve vëker à catchète. Po l’ mwins’, djë savo quë v’s-èstiz là, djë savo qu’on sûvéve lë min.me vôye. Laiyi-m’ co sondji à vos ! Djë n’a pës qu’ vos ! Vos sèroz todë tot por më ! Lë djou dj’ènn’irè ça sèrè avou vos, dins mès-oûy, dins m’ keûr, dins m’ cwârp ! N’èstot-çe ni l’ min.me por vos ? Dëspoy quë dj’a r’çu vosse lète, djë so pièrdë. Djë n’ m’è r’mètrè jamais ! Vos soyë là, vos veûy, në pës polë vos prinde dins mès brès, në pës polë vos-ètinde, në pës polë passer m’ mwin dins vos tch’vias, në pës polë m’ doner à vos, tot-ètîr ! Laiyîz m’ co m’ ragrabouyi ! Min.me s’ë faut ratinde, djë sèrè todë là por vos ! Djë vos vwè volti !
Së vos v’loz brîji nosse loyén, mins èst-ç bén ça qu’ vos v’loz ?, djë m’ènn’irè ! On dët todë qu’one fème vwèt mia volti qu’one ome, qu’one ome prind d’ pës qu’ë n’ done. C’èst po tot ça quë djë so dins lès pwin.nes : djë n’a ni soyë vos doner d’ pës. Djë vos ténrè todë pa l’ mwin, djë sèrè todë à vosse costé. Djë vos vwè volti. Laiyîz-m’ co m’ rafyi dë vos r’veûy on dairén côp. Laiyiz vosse keûr së drovë së m’ dësbautchance. Djë vos vwè volti !…
Lès samin.nes ont passé, Phil èstot-st-èvôye fé s’ timps d’ soudar. Djë n’avo pëpont d’ novèles. Djë m’ touwéve à l’ ovradje po sâyi dè tot rovi. Djë savo qu’èle travayîve dins-one usëne à Lovin, djë m’a mètë dins l’ tièsse d’aler bouter ossë. Michel, më frére avoz fait l’ min.me, lë l’ lèd’dëmwin d’ sès quatôze ans. Poqwè achèver mès scoles ? On d’mandéve dès brès èt dès tièsses dë tos lès costés. À catchète dë mès parints, dj’a courë à totes lès d’mandes dins lès gazètes. Au maus’ dj’a passé l’ prëmi à l’intréye dè l’ « Caisse d’épargne » : pa d’vant bran.mint dès cës qu’avîn’ co d’ pës dë scole quë më. Èstoumakés, mès pârints, lë djou quë l’ lète a tchait së l’ tauve po m’ dîre quë dj’ comincîve lë londë d’après ! Èt dès-oûy d’oulote ; dè veûy lès pëcayons qu’ës m’ pâyerîn’ à l’ fén dè mwès ! Tot bén causé, ë n’avot pës à tchicter, min.me së, djë n’achèvéve ni më daîrëne anéye à scole. Ë m’ chonéve qu’ë valéve co mia mète on pid së l’ costé, quë d’oyë dès r’grèts dë ‘nni l’oyë fait. Tant qu’ dj’i èsto, dj’a tapé l’ flote pë lon : djë leû-z-i fait comprinde quë dj’avo d’mandé dè ravancë m’ tèrme de soudâr : sins leû-z-i d’mander, èt co sëgni l’ lète më min.me !
Dj’avo twârtchi tot ça dins leû dos. Ça a bén grëgni dès dints, malaujîye a-z-asprouver, mins pont d’avance d’aler à r’këlon : ël- èstot trop taurd : faléve bén avaler l’ coloute !…
Marcèle : djë l’avo todë dins m’ tièsse, mins ës m’ont poussi à m’ laiyi meûrë one miyète, on-n-è r’causerot pës taurd. Papa m’a dët : « Ratind cor-one cope d’anéye, à di-sèt ans, të n’ès co qu’on gamin. Laiye të crèche ; lèye, èlle a deûs-ans d’ pës qu’ twè, èt, à ç’t-adje là, one crapôte, c’èst d’dja one fème. Maman t’ l’as d’dja dës combén d’ côps !»…
Djë couréve à totes lès fièsses po waîti dè l’ rëveûy, mins quand dj’èsto à Nodèbây’, lë londë, on m’ rapwârtéve qu’èlle avot sti à Outchâr. Djë lancîve au r’boutadje à Outchâr, èlle èstot à Kèdeûr. Nos famëles në s’ causîn’ pës, mins djë sintéve bén quë dë s’ costé, come dè l’ ménk, on sayîve dè skèter nosse loyén. Dj’avo bau li scrire : jamais one rèsponse ! Lîjéve-t-èle mès lètes ? Lès r’çûvéve-t-èles ? Èstot-ç’ lë min.me por lèye ? Dj’ a prins m’ coradje à deus mwins, courë jësqu’à s’ maujone. Së p’tëte sou m’a v’në drovë l’ëch, èt më r’çure së l’ sou. Èle n’èstos ni là, èt, on n’ m’a ni laiyi rintrer. Dj’ aro bén tchai au r’vièr. Tot quë trëbouléve dins m’ tièsse. Ç’èst come së on m’arot yë foutë on côp d’ coutia, djë n’ vëkéve pës !…
Comint ènn’a dj’ èralé ? Ë n’avot pèrson.ne à l’ maujone. À crwère qu’ës-avîn’ torto courë s’ catchi po ni m’ crwèjeler. Dj’a sti më staurer së m’ lét, blan mwârt, tron.nant come on fouya, po braire lès-oûy fou dë m’ tièsse. Djë n’ m’a èdârmë qu’ a l’ pëquète dè djou. Maman m’a v’në fé lèver en më stindant one lète : faléve aler passer mès trwès djous…
Lès r’comandations tchaiyîn’ one après l’ ôte, come dès plëmions d’ nîve : « Në va ni t’ piède à Brëssèle » - « Dëmande po rëv’në à Bauvètchén, të sèrè pës près d’ nos-ôtes ! » « Në fait ni l’ sot, sondje à nos ! »…
Dj’a rimplë one banceléye dë papis, më mète mièrnë come on vièr, pa d’vant on méd’cén quë m’a fait sofler dins mès mwins, èt m’ dîre : « Ça va : au sûvant ! ». Deûs-eûres pës taurd, djë m’a achid’ pa d’vant on grand chèf avou très stwèles dëssë l’ col dë së tch’mîje èt avou on grand vète polau quë li catchîve tote së-t- orâye.
« Djë vwè së vos papis quë vos vouriz bén yèsse dins lès comandos et cominci vosse terme lë pës rade possëbe. Lë prëmëne lèvéye ; c’èst po l’ mwès quë vént, ça sère po lès tchèsseûs Ardènès, èst ç’ quë ça vo va ? ».
« Oyë, Monsieû ! ».
« Djë vwè ossë quë vos-èstoz on fë d’ cinsis, et quë vos-avoz sti à scole jësqu’asteûre. Vos dëvriz postëler po ièsse ofëcier, nos avans dandji d’ djins come vos, quë savenèt lë prë d’ l’ovradje bén fait, èt qu’ont one saqwè dins leû tièsse !. ».
« Oyë, Monsieû ! ».
« Cès convenances là sont-st-èles à vosse gout ? ».
« Oyë, Monsieû ! ».
« Bén, m’ garçon, nos nos r’troverans en Alemagne, dë d’ çë one cope dë mwès. Djë vén dè yèsse loumé comandant à Spich, èt nos sèrans dins l’ min.me casèrne, po l’ timps d’ vosse tèrme. Plaî-st-à Dië jësqu’à la !».
« Mèrcë Monsieû ! »…
Fén dë ç’ samin.ne là, dj’a courë au bwès d’ Wayindje. Pa d’zo l’ keûr së nosse tchin.ne, ë n’avot one novèle cwachûre tayîye dins lë scwace. Më p’tët coutia a zouplé dins m’ mwin, po ‘nnè fé on X.
N’avot qu’ lèye po conèche noste aube, élle avot v’në. Èle në m’avot ni rovi !…
C’èst-st-avou c’t-ëdéye la dins m’ tièsse quë l’ deus d’ mây’, dj’a baké djë dè trén a l’ gare dë Namèr a l’ pëquète dè djou. Dès soudârs nos ratindîn’ po nos min.ner jësqu’a l’ casèrne « Marie-Henriète »… Nos avons yë one samin.ne avou on vi adjudant, po waîti dè r’conèche lès barètes èt lès stwèles, aprinde a mète së mwin a s’ tièsse : come ë faut, po dîre bondjou come on soudâr, rëçûre nosse novia costëme. Nos n’avans pës yë l’ timps dè taper one bauye. Së l’ dëfén dè l’ samin.ne, on nos èbarquéve tortos a camyon po l’ Allemagne…