À n’nin crwêre, portant c’èst bin mi què l’a pichî foû di m’ tièsse. Portant, si dj’ l’a mètu su papî c’èst qu’ vos m’ p’loz bin crwêre.
Mi vikaîrîye a basculé deûs côps. Li prumêre, c’èst quand m’ feume m’a d’né mès mofes après m’awè faît pwârer dès cwanes pus grandes qui lès sènes. Li deuzyinme, ça a stî quand nos-avans ‘nn’aler èri onk di l’ôte, Danièle èt mi.
Dj’aveû conu m’ feume qui dj’ n’aveû nin co sêze ans. C’èsteut al fièsse à Djodogne dins l’ ponton dèl Lëkène.
On-aveût dansé tos lès rokènbrols èchone. Sins wêre motî branmint. Dji n’ so nin minme seûr qu’on s’aveût r’waîtî comufaut, mins èle danseûve bin. Li lèddimwin, tos mès soçons savin’ qui n’s-èstin’ èchone. Ça s’a trin.né dès-ans au long, li timps qu’ nos fianche trwès raupins. Quand il ont bagué foû d’ nosse nîd, èle ni m’ v’leuve pus dins nosse lét…
Dj’a rèscontré Danièle. Èle aveût couru èri di s’-t-ome pace qu’i s’ min.neûve come on vî dispû qu’èle s’aveût mètu avou. I lî fieûve sès d’vwêrs on côp par samine li sèm’di, po p’lu dwârmu pus taurd li dîmègne. Èle mi l’aveût dit l’ prumêre nut qu’ nos-avin’ passer èchone. Djè l’aveû rabrèssî tot laudje. Èle s’aveût aclapé tot conte mi, si stinde su s’ dos, drovu sès djambes èt m’ dîre : vins !
Èle saveût prinde si plaîji. Èle dijeûve :
« Fé l’amour, c’èst viker. Dji m’ choutero djè l’ fro dèl piquète do djoû jusqu’al vièspréye. » Nos-avans viké one cope d’anéyes èchone. Dji n’aveûve rin à li dîre, mins quand èle vèyeûve qui dj’ nè l’ chouteûve nin, èle dijeûve : « On monte ? »
Nosse tchambe èsteût su l’ plantchî di d’zeû. Èle ni pleûve mau di m’ fé pwârter dès cwanes, lèye. Mins éle saveût bin qui ça n’ durrot jamaîs ossi lontimps qu’ lès contribucions. Ça n’ lî âreût nin plaî d’èsse li feume d’on côrnârd. Èt dji vos l’ pou dîre dès-ocâsions, èlle ènn’aveût à chupléyes. Dji m’ sovin co d’on r’présintant què lî mèteût s’ mwin à s’ fèsse chaque côp qu’ dj’èsteû èvôye èt sayî dè l’ sûre dins l’ dèpôt do botique èwou qu’èle bouteût.
« Dj’ènn’a ausse mi èto » qu’èle lî aveût dit : « Mins dji n’îrè jamaîs avou vos tant qui dj’ sèrè avou Jacky ! Dji so-st-one feume comufaut ! »
I n’ l’a jamaîs soyu awè. Èlle aveût ‘nn’alé èri d’ mi por onk di sès pus vîs soçons. Divant minme qui li r’présintant n’ôye l’ocâsion d’ profiter dèl pas d’ tir come i dijenut lès astronautes li djoû d’audjoûrdu. Dji m’ fou co bin d’ li quand djè l’ rèsconteure, djè lî tape one riséye su l’ nuk di s’ cravate qu’èst mau stitchî, su sès solés qui blinkenut d’ ciradje èt qu’i fieût listrer su lès pègnons d’ sès marones.
Li pus vî d’ sès soçons, on l’ lomeût Guy, On grand mau agayolé qui djouweû do tèyâte avou lèye quand il èstin’ co tot djon.nes. C’è-st-aviè dîj-ût ans, qu’èlle aveût yeû d’ l’atirance po l’ mèteû en sin.ne, èt qu’èlle aveût comprind l’èfèt qu’ ça lî fieut à lèye minme èt do plaîjî qu’èlle i purdeût…
Li cope d’anéyes yute, èle m’a arin.né po m’ dîre qu’èlle aveût bin tûzé :
« Nos n’ passerans jamaîs tote nosse vikairîye èchone, vaut mia nos disclaper onk di l’ôte ! »
« Come di jusse èt d’ raîson ! » lî a dj rèspondu.
Nos èstin’ co dins nosse lét quand èlle m’a anoncî qu’i valeûve mia insi. Dj’a rèpèté : « Come di jusse ! »
Èle m’a d’né on côp de mwin po fé mès valîjes. Wêre di tchôse po bin dîre : on timpe-èt-taurd, one marone, saquants tchmîjes. Dj’a rabroké à m’ maujone soladjî…
C’èst quinze djoûs pus taurd qui dj’ m’a sintu dès manques. Todi pus fwârt. Dj’aveû ausse dè l’ riveûy, dè l’ ténre dins mès brès. Djè lî a tèlèfoné, prèsqui tos lès djoûs. Po m’ plinde, po l’ plinde dèl pin.ne què dj’ li aveu faît tot d’nalant.
On djoû, divant d’ lî dîre à r’veûy come djè l’ fieû tos lès djoûs è lî d’djant : « Dji t’ rabrèsse ! » Dj’a sintu come on pèwiadje dins s’ vwès : « À twè, dji tè l’ pou dîre, nos nos compurdans, Guy vout qu’ nos vikanche èchone ! »
C’èst ç’ djoû là qu’ dj’a comprind qu’ dj’aveu dandjî d’ lèye. C’èst bièsse dè l’ dîre come ça, mins dj’aveû l’idéye qui s’ cwârp èsteût marqué au fiêr dins l’ minke. Lon èri d’ lèye, dji n’aveû pupont d’alin.ne, dj’aveû l’ balzin, dj’èsteû oblidjî di m’ tinre aus murâyes po-z-avancî. Dji n’ sondjeûve pus qu’à lèye. Tos lès jèsses qu’èlle aveût quand nos-èstin’ dins nosse lét mi r’montin’ al tièsse. Dji n’âreû pus soyu viker sins lèye…
I-gn-aveût nin à paupyî. Dj’a ratindu pa d’vant s’ maujone què l’ grand Guy mousse foû d’adlé lèye. I fieûve nwêre nut. I v’neûve dè l’ tinre yinte sès djambes, dj’ènn’èsteû quausu sûr. Dji n’saveû l’awè foû di m’ tièsse.
L’auto à dèmaré sins qui dj’ m’è rinye compte, djè l’a faî bèrwèter l’ cu è l’aîr èt rabroker a m’ maujone.
Dj’èsteû tot jusse rimoussî, qui l’ tèlèfone a chîleté. C’èsteût lèye, po m’ dîre qui l’ Guy s’aveût faît spotchî, qu’èlle èsteût tote ritoûrnéye. Djè li à dit qu’ dj’acoureû tot d’ sûte. Èle mi ratindeûve achîde su l’ canapé. Dji m’a achîd astok di lèye, dj’a mètu m’ brès su sès spales. « Jaki, ô ! Jaki »
Èle tchûleûve à spèssès gotes, si tièsse conte mi spale do timps qui djè l’ bètcheûve su s’ front.
« Ô ! Jaki ! »
Nos avans achèvé l’ nut èchone. Èlle èsteût plin.ne di feu. Dji n’èsteû qu’one amûsète yinte sès mwins.
Audjoûrdu, djè l’ sé bin, nos n’arin’ jamaîs yeû d’vu ènn’aler èri onk di l’ôte.
I m’arive co bin di m’ dispièrter sankènaîwe dèl nut. C’èst lèye qui m’assatche tot conte lèye.
Nos d’vêrans vîs èchone !