Prumire lete da sint På ås djins d’ Corinte/II
II
1 — Po mi, frés, cwand dj' a stî addé vos, ci n’ est nén e volant esse pus grand på lingaedje ou pa l' syince ki dji vén po vs advierti do messaedje då Bon Diu.
2 — Paski dji n’ a nén pinsé saveur ôte tchôze addé vos, såf Djezus, yet Djezus moirt dissu ene croes.
3 — Mi-minme, dj' esteu addé vos ene miete flåwe yet dj' aveu peu;
4 — Mi lingaedje yet mes pretches ni rpoizént nén so des syincieusès prouves, mins po mostrer l’ Esprit e l’ foice…
5 — … po k' vosse fwè ni soeye nén båsteye sol syince des omes, mins sol foice då Bon Diu.
6 — Portant, c’ est ene syince ki nos pretchans addé les djins comifåt, ene syince ki n’ est nén d’ asteure, ni des mwaisses d’ asteure, ki seront ramoennés a rén.
7 — Nos pretchans li syince då Bon Diu, catcheye, ki l’ Bon Diu aveut tuzé lontins divant les djoûs d' ouy, et çoula po nosse glwere.
8 — I gn a nouk des mwaisses d’ asteure ki l’ a cnoxhou paski, s' i l' årént yeu cnoxhou, i n’ årént nén stî mete el Signeur del glwere so ene croes.
9 — Mins, ç’ est come il est scrît :
« Çou ki l’ iy n’ a nén veyou,
Çou ki l’ oraye n’ a nén oyou,
Eyet çou ki n’ a nén monté dins l’ cour da l’ ome,
C' est tot ça ki l’ Bon Diu a-st apresté po les cis ki l’ veyèt voltî.»
10 — A nozôtes, li Bon Diu l’ a fwait saveur pa l’ Esprit. Paski l’ Esprit naxhe dins tot, minme dins les parfondeurs då Bon Diu.
11 — Kî, dins les omes, sait bén çou ki rwaite l’ ome, såf l’ Esprit d' l' ome k' est ådvins ? Come çoula, nolu n' sait çou ki rwaite li Bon Diu, såf ès-n Esprit.
12 — Eyet nozôtes, nos n’ avans nén rçû l’ Esprit då monde, mins li ci då Bon Diu, po sepi çou ki l' Bon Diu nos a dné pa s’ gråce.
13 — Eyet nos è cåzans, nén avou les sincieus mots des omes, mins avou les cis d' l' Esprit, tot-z esplicant les verités di l' Esprit a des omes d’ esprit.
14 — Mins l’ ome ni rçût nén les afwaires då Bon Diu, pask' ele sont des biestrijhes por lu ey i n’ les pout nén conoxhe, paski c’ est avou l’ Esprit k’ on djudje.
15 — L’ ome d’ Esprit, lu, djudje di tot ey i n’ est djudjî pa nolu.
16 — Oyi da : « kî a conoxhou li pinsêye då Bon Diu po l’ espliker ? » Eyet nozôtes, nos avans li pinsêye då Criss.