Prumîre lète da Paul aus djins d’ Corinte/XIV

Ciste ouve ci egzistêye eto divins ds ôtès ortografeyes : Ortografeye do scrijheu - Rifondou walon.

Sint På

XIV

ratournaedje da Maurice Debaty, rortografyî e Feller pa Lucyin Mahin

Prumîre lète da Paul aus djins d’ Corinte, 2020

XIII

XV

XIV

1. Cachîz après l’amour, sondjoz ossi aus dons di l’Èsprit, mins surtout aus cis dès profécîes.

2. Ayi, li ci qui cause en linwe ni cause nin aus-omes, mins au Bon Diè, pasqui nuk nèl comprind èt c’èst dins l’èsprit qu’i dit dès mistêres.

3. Li ci qui profétise, li, i cause aus-omes, lès faît crèche, lès-invite, lès rapaujtéye.

4. Li ci qui cause en linwe crét li-minme ; li ci qui profétise faît crèche l’Èglîje.

5. Dji vou qui vos causéche tortos en linwe, mins dji vou co dpus qui vos dijoche dès profécîes. Li ci qui profétise èst pus grand qui l’ ci qui cause en linwe, à mwins qui ci dèrin ni s’è siève po qui l’Èglîje crèche pus fwart.

6. Èt asteûre, Fréres, à qwè èst-ç' qui dji sièvreu, si dji vos cauzreu en linwe à l’ place dè vos-apwarter on lingadje di rèvèlâcion, di conichance, di profécîe.

7. Si dès-afêres qu'i-gn-a, qui n’ boudjèt nin èt qui rindèt on son, come one flûte ou one harpe, ni rindèt nin dès sons difèrins, comint ricnoche çu qui li flûte djouwe èt çu ki li harpe djouwe.

8. Èt si li trompète done on son qu’on n’ coneut nin, quî s’aprètrè po s’ aler bate.

9. Èt vos, si, pa vosse linwe, vos n’ dinez nin one saqwè qui a dè sinse, comint comprinde çu qui vos dijoz ? Pasqui vos cauzroz è l’aîr.

10. Dins totes lès sôrtes di lingadjes au monde, i-gn-a nin onk qu’èst foû sqwêre.

11. Adon, si dji n’ coneu nin li sinse d’on lingadje, dji sèrè on sauvadje po li ci qui l' cause èt i sèrè on sauvadje por mi.

12. Èt vos-ôtes, vos vloz awè brâmint dès dons: qui ça seûye po l' bin d' l'Èglîje.

13. Vola poqwè qui li ci qui cause on lingadje dîche sès priyéres po comprinde.

14. Pasqui si dji di one priyére dins on lingadje, m'-y-èsprit è-st-en priyére, mins mi cervia dimeûre setch.

15. Qui faut-i fé ? Dji dîrè dès priyéres pa l’èsprit, mins dj’è dîrè ossi avou mi cervia ; dji tchantrè pa l’èsprit èt dji tchantrè pa l’ cervia.

16. Ôtrumint, si ti rmèrcîes pa l’èsprit, comint li ci qui choûte poûrè-t-i dire « âmèn » pousqu’i n’ comprind nin çu qui ti dis ?

17. C’èst vraî qui ti dis dès bons rimèrcîmints, mins l’ôte n’èst nin pus fwart.

18. Dji di dès rmercîmints au Bon Diè di çu qui dji cause dès lingadjes dipus qui vos-ôtes tortos ;

19. Mins è l’èglîje, dj’inme mia dîre cinq mots avou mi cervia po-z-aprinde aus-ôtes, pus rade qui mile mots dins on lingadje.

20. Fréres, ni soyoz nin de èfants po djujer, mins po l’ mau, soyoz dès ptits-èfants, èt po l’ djujmint, soyoz dès-omes bin faîts.

21. Il èst scrît dins li lwè :

« C’èst pa dès-omes d’on-ôte lingadje èt pa dès lèpes d’ètranjéres qui dji causrè aus djins ; èt i n’ mi choûtront minme nin come ça. » a dit l' Sègneûr.

22. Insi, lès lingadjes sont on sine, nin po lès cis qui crwèyèt, mins po lès cis qui n’ crwèyèt nin. Adon qui lès profécîes sont on sine po lès crwèyants èt nin po lès non-crwèyants.

23. Insi, si l’Èglîje tote ètîre si rachone, qui tortos causèt li minme lingadje èt qui dès non-crwèyants arivèche, ni dîront-i nin qui vos-èstoz loignes ?

24. Mins, si tortos dijèt dès profécîes, èt qu’arive on non-crwèyant ou on choûteû, il èst djujé pa tortos ; lès scrèts di s’ coeûr sont discouvièts.

25. Adon, toumant su s’ tièsse, i-y-adorè li Bon Diè èt dîrè qui li Bon Diè èst vraîmint au mitan di vos-ôtes.

26. Èt qwè fé, fréres ? Quand vos vos rachonez, chaque a-t-i on tchant, on lingadje, po qui tot si fèye po yèsse pus fwart ?

27. Si onk cause deûs ou trwès lingadjes, èt chaque à s’ toûr, qu’i-gn-auye onk qui esplique !

28. Èt s’i-gn-a pont, qu’on s’ taîye dins l’èglije ; qu’on cause à li-minme ou au Bon Diè.

29. Po lès profétes, qui deûs ou trwès causèche èt lès ôtes djujèche.

30. On-ôte a-t-i one saqwè à dîre ? Qui l’ prumî si taîye.

31. Pasqui vos ploz tortos dire dès profécîes, onk après l’ôte po qui tortos seyèche au courant èt escoradjis.

32. Lès-èsprits dès profétes sont présintés aus profétes.

33. Pasqui li Bon Diè n’èst nin on Bon Diè di guere, mins di paîs.

34. Come dins totes lès-èglijes dès sints, qui lès feumes si taîjèche pasqu’èle ni plèt nin causer èt qu’èle choûtèche, come li dit li lwè.

35. Si èle vlèt sèpe one saqwè, qu’èle dimandèche à leû-z-ome dins leû maujone ; pasqu’il èst mau vèyu qui lès feumes causèche dins one èglije.

36. Èst-ç’ di vos-ôtes qui li lingadje dau Bon Diè a moussi foû ? Ou èst-ç' à vos-ôtes tot seûs qu’il a parvinou ?

37. Si one saquî crwèt yèsse proféte, qu’i ricnoche qui çu qui dji scrî è-st-on-oûrde dau Sègneûr.

38. Èt si one saquî nèl sét nin, c’èst qui li Bon Diè nèl coneut nin.

39. Insi, fréres, lèyoz v’ tenter à dire dès profécîes, èt n’èspêtchîz nin dè causer dès lingadjes.

40. Mins qui tot s’ fèye comufaut èt dins l’oûrde.