Pormoennåde a Mondjoye

Èn årtike di Wikisource.
Pormoennåde a Mondjoye
Li Rantoele  65,
Pormoennåde a Mondjoye

Manfred Lejoly fwait todi binamêymint l’ guide po nos fé discovri li payis almand metou djusse astok del Walonreye. Ouy, i nos va pormoenner a Môdjôye (Mondjoye).

Co on côp, ci responda cial est metou e videyo sol tévé walon-cåzante di « VoBuze » (Youtube).

Dimandeu (Dm.) — Ça fwait ki nos estans a ... a Monschau u a Mondjoye, Manfred ?

Manfred Lejoly (M.L.) —  I n a troes manires d’ el dire. E walon – e nosse walon – c’ est « Môdjôye » ; et mondju, ci n’ est nén lon d’ addé nozôtes. « Monschau », c’ est l’ no oficire e-n almand dispoy seulmint 1918. Pocwè ? I sicrijhént « Montjoie », come e francès. Al fén del guere, come i gn aveut des rumeurs ki l’ Beldjike voleut anecser des bokets d’ l’ Almagne, i s’ ont vite rapinsé di mete on no ki freut on pô pus almand. Les djins vola, e leu « plat » (almand) locå, dijhèt « Mon´tchë ».

**************

M.L. — Vola, nos avans èn egzimpe di çou k’ on lome les « ouxhs di Mondjoye », ces ouxhs d’ intrêye wårnis avou des gros clås. C’ est tipike.

**************

M.L. — Ns estans dedja vola e l’ ecinte do tchestea. Li tot prumî tchestea ki les contes do Limbork ont basti esteut puzieurs kilometes e-n amont di Mondjoye. Et après côp, i l’ ont basti vola. Et on pinse – on n’ est nén totafwait seur – ki l’ tot prumî tchestea, c’ est çou k’ on voet vola sol tiene di l’ ôte costé d’ l’ aiwe, la. Et après côp, il ont basti ci-vola. Et ça sierveut tofer d’ uzufrut po l’ eritî del conteye, après côp dutcheye do Limbork. Limbork a stî rprins på Braibant, et l’ teritwere vola, shûte a des eritaedjes et des ratchtaedjes a vni finålmint a Djulé, pu al Bavire, et après côp co al Prûsse.

Dm. — A Djulé ?

M.L. — Awè, e-n almand, « Jülich », e francès « Juliers », dins nosse walon « Djulé », inte Åxhe et Dûsseldoûpe (Düsseldorf). Ça a stî ene pouxhante dutcheye del Mîtrinne Ådje. Al fén, les duks di Djulé avént rashonné divins leus mwins leu prôpe dutcheye pluss li dutcheye di Claive (dins l’ Bas-Rén, eviè l’ frontire holandesse), li teritwere di Biedje (almand « Berg », sol droete erive di Rén), ey eco des ôtes pitits payis.

Cwand l’ dierin duk mora sins zwer, gn ava ene guere di succession, et l’ dutcheye fourit disminbrêye. C’ est adon k’ Mondjoye passa al måjhon d’ Bavire.

**************

Dm. — C’ est Mondjoye, dabôrd ? Li veye ?

M.L. — Åy ! Ele poite li tite di veye, mins ça n’ est nén pus gros k’ on viyaedje. A gåtche, i n a on ptit ri ki vént racsure Roûle, la k’ on-z a trové plaece po basti kékes manaedjes. Li Roûle toûne... toitche totåtoû do tiene do tchestea. Adon, ele riva la sol droete. On n’ a savou waire basti. E fond, c’ est foirt sitroet et come vos voeyoz, i gn a des gros teras ki n’ permetèt nén al veye di s’ awaler pus lon.

**************

M.L. — Dji djheu enawaire ki, divant k’ i gn euxhe ene veye ou minme on viyaedje, i n a-st avou l’ tchestea. Çou ki a, adon après côp, diswalpé l’ veye di Mondjoye, c’ est l’ industreye del linne. I fåt saveur ki tos les ris ki cwitèt l’ Fagne, totåtoû, ont ene aiwe foirt seure (acide), sins tchåsse. Et i faleut, di ci tins la, i faleut absolumint çoula po poleur låver les linnes, et lzî dner des belès coleurs. C’ est po çoula k’ on-z a avou l’ industreye del linne a Vervî, par egzimpe – li pus conoxhou – a Stolbiè (Stolberg), a Neyåw et a Mondjoye.

Dm. — Et on voet co ça so les måjhons, ki ça a stî ene veye di linnîs ?

M.L. — Vos voeyoz totavå des bokets d’ toet ki dispassèt. I n aveut ladzo des winnes k’ estént metowes la po sorlever les balots d’ linne. Pocwè ? Pask’ i n’ aveut nén des grandès fabrikes. I n aveut kékes ovroes, mins beacôp d’ l’ ovraedje esteut rmetou a des pårticulîs k’ ovrént el måjhon. I texhént – il avént des mestîs po texhe –, e leu dmorance et i saetchént li linne so les gurnîs. N a des manaedjes vola k’ ont cénk shijh astaedjes avou deus gurnîs.

**************

Dm. — Ene eglijhe baroke, avou on cégne al copete.

M.L. — On voet on clokî baroke : c’ est ene eglijhe protestante. Ça, c’ est interessant a saveur. Ns estans dvins ene contrêye purmint catolike, avou ene pitite mwinristé protestante. Et, e l’ istwere del linne – pusk’ on djåzéve del linne –, a on moumint dné, avou les margayes rilidjeuses, å 17inme sieke, les texheus a Åxhe ont stî tchessîs evoye. I n’ vlént pus des protestants. Mins djustumint, divins ces djins la, n aveut des cis foirt sincieus, k’ avént diswalpé ene tecnike a pårt po fé des belès sitofes. Et c’ est vraiymint zels ki ont diswalpé l’ industreye del linne vola. Et avént, po fini, des télmint belès sitofes di totes les coleurs k’ esportént disk’ a Sint-Petersbork el Rûsseye.

Tot çoula a stou fini, prumirmint pa les gueres. Paski cwand li Revolucion francesse et les tropes di Napoleyon ont vnou pa vola, les martchîs almand et rûsse estît finis. Après côp, ç’ a stî prûsyin, et adon ç’ a stî l’ martchî francès k’ esteut fini. Eco ôte tchoi : les Inglès avént diswalpé des metodes tchimikes ki permetént, avou nimpôte kéne aiwe d’ obtini les minmes rizultats.

**************

Dm. — Ça fwait k’ on a on bî ki s’ tape e Roûle, et ci, on a ene rodje måjhone. Cwè çki c’ est, Manfred ?

M.L. — Bén c’ esteut ene måjhon djustumint da onk di ces fabricants d’ linne, ki sierveut totsi bén d’ fabrike ki di dmorance, insi. Elle est completmint meublêye, co d’ epoke, et on l’ pout viziter.

Dm. — C’ est on muzêye ?

M.L. — Åy, c’ est todi prôpieté del famile, mins il ont fwait èn acoird avou l’ veye, et on l’ pout viziter.

**************

Dm. — Ça fwait k’ c’ est « RoûLe », dabôrd, Manfred ?

M.L. — E walon, c’ est « Roûle », e-n almand « Rur ». Li Roûle ki triviersêye vola Mondjoye a s’ sourdant toprès d’ Bôdrindje. Ele passe li frontire, passe a Mondjoye. On pô pus lon, elle est ratnowe pa on foirt foirt grand båraedje – passé deus cints miyons d’ metes cubes d’ aiwe. Adon, ele vore e les grandès veyes industriyeles : Dûren, Djulé. Et finålmint, ele racsût Mouze e Limbork holandès, a Roûlmonde.

Dm. — Li gueuye del Roûle !?

M.L. — Li gueuye del Roûle !

**************

Dm. — C’ est ene foto classike, d’ après vos, Manfred ?

M.L. — C’ est motoit l’ foto k’ a l’ pus sitou conoxhowe di Mondjoye. On voet... l’ Roûle, on voet li fameuse Rodje Måjhon, on voet les ôtes manaedjes tipikes ; on voet li vî tchestea. Ç’ a l’ air d’ esse télmint tipike di l’ Almagne, don, ki les Aloyîs l’ ont fotocopyî a cint meye d’ egzimplaires et les fote avou leus avions so les les tropes almandes po les dismorålijhî ; avou on tecse ki dijheut : « Ni serîz vs nén contins di rtrover vosse patreye ? »

Dm. — Mins Mondjoye n’ a nén stî bombårdêye e 1945. Pocwè ?

M.L. — Neni. Les viyaedjes totåtoû so les hôteurs on sofri beacôp pus. Fåt croere ki les obus ont passé padzeu di ci trô la.

**************

Dm. — On gros manaedje di Mondjoye, et tot d’ on côp, ki voet on, so li dzeu d’ l’ ouxh ? On bara (berå). Et, a costé d’ mi, èn ôte Bara !

M.L. — Bén, li moton – l’ bara – k’ on voet vola so li dzeu d’ ouxh, a bén seur a vey, co ene feye, avou l’ linne. Dji wadjreu hote et burtales ki ci gros manaedje vola esteut l’ ci d’ on fabricant d’ linne.

Dm. — Et l’ bara ki cåze asteure, c’ est... ça n’ a rén a vey avou l’ linne ?

M.L. — Neni, c’ est Manfred Lejoly d’ Ôvîfa, et on lome les djins d’ Ôvîfa « Baras », et on nd est fir, eco.

Dm. — Ebén merci bråmint des côps, Manfred.

Note Wikisourd

responda ramexhné li 11 d' octôbe 2012; dins l' modêye papî, gn a kékes målåjheys mots ki sont ratournés e francès; gn a co rieu kékes pitits rcoridjaedjes vaici