« Pocwè diss ki l’ monde pied ses tåtes,
K’ i s’ diswalpêye dissu des dfåtes,
Et ki c’ ere li bon tins
Do trevén
K’ i viként,
Nos parints ?
Pus ene grande guere sol continint
Ça, dispoy septante-cénk ans d’ tins !
Les pus pôves did par ci
Sont lodjîs
Et payîs
På Payis.
S’ i gn a-st ene rascråwe, ene minêye,
Tote li Daegne est mobilizêye.
On n’ tuze pus tant a s’ bate.
Po piker
‒ Eplocter ‒,
On si ctape.
Les pus nouvès tecnolodjeyes,
‒ Li sûtifone et ls éndjolreyes ‒
S’ ont spårdou tocosté,
Raloyant
Les vicants
So ene åvé.
Oyi, dji t’ catche les mwais costés. »
« Po on powete, kéne flåwisté !
Honte a t’-minme. Fåt ki t’ rimes
So les rmoirs.
Et sol moirt,
Toitche ti-n ime. »
Sol grand batea tins del trevåtche del Mîtrinne Mer, li 11 d’ octôbe.