« Pocwè diss ki l’ monde pièd sès tåtes,
K’ i s’ diswalpêye dissu dès dfåtes,
Èt ki c’ êre li bon tins
Do trèvin
K’ î vikint,
Nos parints ?
Pus ène grande guère so l’ continint
Ça, dispoy sèptante-cénk ans d’ tins !
Lès pus pôves did par ci
Sont lodjîs
Èt payîs
På Payis.
S’ i gn a-st ène rascråwe, ène minêye,
Tote li Daegne èst mobilizêye.
On n’ tuze pus tant a s’ bate.
Po piker
‒ Èplocter ‒,
On si ctape.
Lès pus nouves tècnolodjèyes,
— Li sûtifone èt l’s-indjolrèyes —
S’ ont spårdou tot costé,
Raloyant
Lès vicants
So ène åvé.
Oyi, dji t’ catche lès mwês costés. »
« Po on powête, kéne flåwisté !
Honte a t’-minme. Fåt ki t’ rimes
So lès rmwârs.
Et so l’ mwârt,
Twatche ti-n ime. »
Sicrît sol grand batê tins del trevåtche del Mîtrinne Mer, li 11 d’ octôbe 2021; eplaidî dins « Singulîs » avou on ptit motlî.