Cisse pådje ci a stî coridjeye ey est l’ minme ki l’ sicanaedje.
— 36 —
SINNE XIII
LES MINMES — POREA
POREA
Ki gn a-t i don ? Si dispite-t on cial ?
GÅRNIR
Ba c’ est Dadite loukîz la, ki n’ sait måy mi leyî påjhûle. Mi ki vént cial por leye — inte nos deus soeye-t i dit — ele mi rçût pé k’ on tchén dvins on djeu d’ beyes.
POREA
Vos deus, vos vs dispitez todi.
GÅRNIR
Bén loukîz i m’ shonnéve portant k’ nos estîs fwaits po nos etinde !
DADITE
Awè, todi seur !
GÅRNIR (a Porea)
Valet, i fåt loukî so vosse feme, ele mi voet tos les djoûs pus voltî, on djoû çoula toûnrè må, et mi, dji n’ respond d’ rén savoz.
POREA
Dji so sins nole sogne.
GÅRNIR
Vos avoz toirt, infén dji vs a prevnou. Asteure, ki vou dju dire, vinoz vs avou mi ?
POREA
Wice alez vs ?
GÅRNIR
Dji m’ va-st al Hirondelle, mete mi djonne bleu. Et bén ?
