— « I n’ sont nén meurs, dit-st i, i sont co tot pelots !
« Leyans la ça po les marmots. »
On voet ça tos les djoûs asteure :
’Ne sakî voet ’ne sacwè d’ bea, ça vént lyi schôpyî s’ keure !
— Oneur, årdjint, twelete ! ça lyi freut bén do bén !
I n’ pout l’ aveur, ça n' våt pus rén !
« Come on s’ coûtche, on rfwait s' lét, tchaeconk sint come i vike !
— Mi dj' arindje èm botike,
Ki rén n' mi tinte ! bea ou ritche dji m’ è fou,
Et dji n’ passe nén : po on dji vou, dji n' pou.
Les Leus eyet les Berbis.
Après co pus d' meye ans, d$ ene guere a tot sketer,
Les Leus et les Berbis, vlént fé ’ne påye, eyet l’ shure ;
Po n' pus s' porshure eyet s' distrure ;
I wangnént tos les deus, på martchî a toper :
Si l’ Leu stronneut ’ne Berbis, ou èn Agnea al tete,
Les bierdjîs avou s’ pea s’ fijhént pus d’ ene caskete,
Djilet, carnassire et malete !
Si les Bedots n’ oizént djiboter dins l’ paxhi,
Les Leus porseur eto, n’ estént nén mî rashids !
Al fén vla l’ påye k’ est etindowe,
Les Leus laiynut leus djonnes, po waerants k' on nd estént,
Et les Berbis dinnut leus tchéns !
L' notaire escrît les papîs, on lyi paye ès bénvnowe,
Et l' afwaire est keudowe.
Les djonnes des Leus crexhnut, cominçnut a cori,
– Efant d' tchet mougne voltî sori ! –
