Les djins drovént des ouys, lådjes come des poites di gregne,
On Liyon vént do côp, leu dit : « Ô biessès djins !
« L’ barbouyeu, vos fout tertos ddins !
« E vos mostrant ça so s’n essegne :
« Eyet d’ vir ça gn a d’ cwè esse anoyeus !
« Djhoz ki ç’ n’ est nén do pî k’ i s’ mouche !
« Gn a del råjhon k’ nos sréns å dzeu,
« Si nos pléns nos siervi d’ ene broushe.
Fjhoz vo portrait vos-minme d’ vo tiesse ou bén d’ vo pea,
Pont d’ ebaras ! seur k’ i srè todi bea !
Leyîz vos djudjî pa ls ôtes, po vos diner do lindje,
Ptete ki deus troes diront do må !
Vos sroz mwais eyet plin d’ difåts !
Mins leyîz les dire : on djoû, vos åroz vo-n ervindje !
L’ Ernåd eyet les Roejhéns.
Dj’ a etindou conter k’ on Rnåd,
Dins on djårdén esteut rtcheu pa on trô !
I rwaite pa tot costé, les poeres et les biyokes,
Ça n’ lyi shonnéve nén bon, po rischurer ses brokes !
I lyi faleut ’ne sacwè d’ meyeu !
I voet ’ne crape di roejhéns, pindowe, rodje come ene grintche !
— « Nos î estans, dit-st i, al vraiye taeye a caclindjes !
L’ è vla bén anoyeus !
I n’ pleut nén daler l’ prinde,
Et nén moyén del fé dischinde !
