I vindnut l’ paradis, come leu-n aiwe del Salete.
Vicans e bråvès djins a ls ôtes sins fé do må
Nén dandjî d’ awè peu e s’ endalant låvå !
D’ purgatwere, ni d’ infiers !
Ni co des diales tot noers !
Bén dj’ vôreut bén k’ on m’ dijhe ou çki ça est stitchî ?
Si hôt k’ on gripe e l’ air on n’ pout rén aprotchî !
L’ bon Diu, meyeu ki l’ pwin, pask’ on n' va nén a messe,
N’ pout nén vos fé rosti, po on ptit côp d’ djonnesse !
Dire k’ i nos rshonne !! n’ est ç’ nén biesse eyet sot ;
Waitîz l’ frimousse då Paul Jaquot !
L’ foice dins l’ monde kii moenne tot, no n’ polans nén l’ comprinde
Fé s’ portrait et l’ lomer, on n’ pout nén l’ eterprinde !
L’ solea lût, l’ såjhon vént, tchaeke a toû sins candjî,
Pocwè ? pa kî ? comint ? gn a nén a î sondjî !
Çk’ on dit : l’ bon Diu s’ fout d’ nos ! waitans di nos soladjî !
I våreut mieu d’ elver, ls efants dins l’ droet, l’ divwer,
A scole lijhans nos lwès, k’ a l’ eglijhe dins l’ priere[1] !!
Cwè çki rtoûne di tot ça ? c’ est k’ on n’ croet pus a rén !
Pocwè çk’ i n’ pretchnut nén : l’ råjhon, l’ droet, l’ djusse, et l’ bén ?
Å lieu d’ nos egueuzer e waitant d’ nos fé croere :
Tant d’ biestreyes, d’ contes d’ efants, eyet d’ viyès istweres !
Dj’ èm va co vos dire ene sacwè ?
S’ i n’ aveut nén d’ djindåres, d’ prijhon, d’ bourea, d’ djustice,
Cwand vos fjhoz må ki vos apice,
Et s’ i n’ aveut k’ l’ Eglijhe, l’ Evandjîle, et l’ Curé,
Cint côps par djoû, on sreut volé, stronné.
— Mins do gurnî, rtcheyans al cåve,
Eyet rvinans rade a no fåve :
Si Matî dins s’ pousse boet todi,
I srè bén plin po lyi vudî.
Bråmint d’ djins dins ç’ monde ci, waitnut å dzeu d’ leu tiesse,
Pretchnut, pålnut, splicnut, a ds ôtes k’ i croeynut biesses,
- ↑ priere purade ki priyire po wårder l’ rimaedje avou divwer.
