Matî Lansberg dins l’ pousse.
Matî Lansberg studyive les estoeles å stoelî,
Båyant e l′ air, sins waitî a ses pîs !
Vla k′ i tchait dins on parfond pusse[1].
I vleut predire l’ avni ; dins cint ans l’ tins tot djusse,
L’ guere et l′ påye, el famene, el pesse et l’ moirt des djins !
L’ fén do monde et des rwès, et d’ leu gouviernumints !
Nén pus lon k’ ès nez sins vir clair !
Cwek’ i n’ predijheut nén k′ dins l′ pousse i daléve tchaire ?
Soeye dit e passant sins façon,
Djhoz ki vla ′ne rude luçon,
Pol påpe et ses curés, et tos leus filozofes
Ds araetchus d′ dints covrous d′ l′ estofe !
« Pretchant : ki l’ bon Diu fwait : l’ påye, l’ guere et l′ colera !
« K′ do tins passé so tere, i fjheut ′ne masse di miråkes,
« K′ nos broûlans dins l′ infier si nos n’ fijhans nén nons påkes ;
« Si nos mougnans del tchå cwand l′ vénrdi sint est la !
(Mins çki n′ les espaitche nén, les losses,
D’ sol vén et sol pexhon, ç’ djoû le di s’ fote ene bosse !)
« K′ nos ravicrans tertos, cwand l’ fén do monde vénra[2] !!
— Kî çk′ a stî vir låvå l′ paradis ou l′ infier ?
No pea n′ broûle todi nén, on l′ fout shijh pîs dzo tere !
Et i dijhnut k′ no-n åme, c’ est moens kel pus ptit vint ;
Dalez broûler do vint ! tapez filet la ddins !
Mins l′ miråke èn fwait pus des sienes[3] !
Bon do tins k’ on fjheut croere — k’ ene vexheye c’ est ’ne lantiene !
L’ fjheu d′ miråke, on l’ fout å prijhon !
Gn a pont d′ miråke po lyi spårgnî s’ plondjon !
Tot ça, c′ est ds atrapes liårds, po rimpli leu malete !
