Mins co pus maléns k’ yeusses, po vir clair dins l’ papî,
I frént mieu d’ waitî a leus pîs.
El Live eyet les Gurnouyes.
On Live, rabouloté dins s’ fosse,
Ruminéve tot seu dins s’ caboce ;
Cwè vloz fé cwand on n’ pout dvizer avou ’ne sakî !
— « Dji so rindou djheut i ! et dj’ nd a assez d’ vikî[1] !
« Dj’ triyane di froed et d’ peu ! Alans c’ est ene mizere !
« On m’ tchesse å tchén, å plonk ! å furet, dins m’n erpere !
Les djins è pasnut ostant k’ mi :
Clås, gote, må d’ dints, må d’ tiesse, uzé, pôve, alanmi !
Si vont dins l’ Paradis, cwand i fwaiynut l’ culbute,
« Pocwè n’ nén leu diner tot d’ shûte ?
« L’ ci k’ est moirt est bén moirt !! et i leye tot padrî !
« Tant sofri po mwezi ! Pocwè viker si vî ?
— « Chute ! schoûtans! vla do brut ! c’ est co ene algaråde !
« Gn a nén a toirtiyî ! evoye et co pus rade.
« Dj’ èm va ndè vir des grijhes ! Dj’ a l’ vesse, et dj’ so strindou !
« Patatrake! mi vla dischindou !!
— I prind ses djambes a spale ; i va bougrémint roed,
I sôtele å dzeu d’ on fossé ;
Et çk’ i n’ voet nén ’ne binde di Gurnouyes,
S’ estitchî å pus rade, dins l’ aiwe et les berdouyes !
— Bén ndè vla ene, dit-st i, couyon come on galeus,
« C’ est mi ki leu fwai awè peu !
« Dj’ voe bén k’ si les djins m’ fotnut l’ vesse
« A ds ôtes dj’ è fout ostant dins l’ tiesse.
- ↑ vikî purade ki viker po wårder l’ rimaedje avou sakî
