E dmorant mwaisse tot seu, do paxhi et des prés !
’ne pôve gurnouye les rwaiteut d’ tot près,
Breyant come èn efant ! disbåtcheye eyet trisse.
’ne rinne côrete lyi dmindeut :
« Pocwè çk’ ele fjheut,
» Ostant d’ sospirs, come des pets d’ vatches ?
— Endè veyoz nén, dit-st ele, gn a onk d’ yeusses deus ki cache,
« A fé chamter l’ ôte po esse Rwè !
« L’ rossé lairè l’ paxhi ! rbatrè basse eyet flaxhe,
« E pestelant fossés et ris,
« E nos spotchant avou ses pîs !
« Ttossu plates, k’ ene foye di papî !
« Ene après l’ ôte, fårè ki nos apice !
« Payant les pots cassés, po les ouys del djinisse !
— Ele n’ aveut nén minti : l’ pierdant ç’ a vnou muchî,
Dins leu fossé, tot disbåtchî,
Et pa pougneyes les a spotchî.
Vos veyoz k’ tot costé, et k’ di tot tins, Françwès,
Les ptitès djins paynut, l’ sotreye des gros bounets.
Mins gn a bråmint d’ leu fåte ! I fjhèt l’ sourd eyet l’ biesse !
Dalez, vos, stitchî dins leu tiesse
« K' on freut sins Påpes, sins Rwès,
« K’ ça cousse bråmint des liårds, k’ c’ est yeusses ki fwaiynut l’ guere,
Cweke tos les djins, sont frés so tere !
« K’ Djezus-Crisse dviè les pôves, daléve a pî dischås,
L' påpe dit k’ i l’ erprezinte, a ’ne carotche a shijh tchvås !
Des lacais, des sôdårds, des diyamants, et ds ôrreyes !
Djezus-Crisse pretcheut l’ påye ! il ôrdone les touwreyes !
I fwait bodjî s’ savate ! ké toupet ! ké biestreye !
