Ç’ fåve ci convénreut bén pol consey del redjince,
Ou çk’ on tchoezi todi, l’ moyén ki sreut l’ meyeu,
Mins vir l’ ome po sayî, ki prind l’ prumî l’ avance,
Vla l’ nuk, dit-st i l’ soyeu !
On Leu ki plaite conte on Rnåd.
On leu s’ plindéve : k’ on lyi aveut pris s’ malete !
On rnåd ki n’ valeut nén mia k’ li[1],
Pa les djindåres aveut stî pris
Eyet come el coupåbe, esteut tnou sol selete.
On séndje, come djudje, dins ’ne tcheyire est ashid ;
On n’ aveut nén co veu d’ afwaire si ebrouyeye !
Les avocåts criyént, k’ leu vwès nd est erouyeye !
Il avént ddja tatlé, pus d’ troes djoûs sins låtchî !
Mins l’ djudje ki cnoxheut mes deus droles,
S’ erleve, ès grawe, prind ’ne penêye et l’ parole :
« Ti Leu, dit-st i, ti t’ plins, on n’ t’ a nén volé ’ne dute !
« Si t’ n’ as nén volé l’ Leu, ti Rnåd,
« T’ as volé bråmint ds ôtes ! El tos les deus tot d’ shûte,
« Dji vos evoye xhufler dins l’ trô. »
E dnant toirt a deus gueus, on n’ pout nén fé d’ biestreyie ;
L’ ome di cour, acuzé pa on vårén, on sot,
Årè droet cwè k’ l’ ôte dijhe ; dins l’ proviebe nén d’ mintreye :
« On n’ est jamwais noeri k’ pa on noer pot. »
- ↑ li purade ki lu po wårder l’ rimaedje
