« Vos, séndje vinoz droci, waitîz les ôtès biesses,
« Comparez vos a yeusses, estoz contin d’ vo pea ?
— « Mi, dit-st i, pocwè nén ? I m’ shonne ki dj’ so l’ pus bea,
« Dji so droet come on djonc, dji sôtele, dji so lesse,
« Dji grigne des dints, dji m’ grawe, dji fwai ’ne masse di grimaces,
« Et on n’ vout k’ mi dins les dicåces ;
« Sins m' cawe, dji sreut come on Monsieu !
« Mins onk ki freut bén braire lés biesses cwand on leu mousse,
« C’ est m’ cuzén l’ oûsse, foice ki’ il a ’ne laide frimousse,
« Èn dirîz nén k’ il a passé dins li feu ?
— Vla l’ oûsse k’ arive la dsu, on pinse bén ki va s’ plinde ;
« C’ est k’ mi, dit-st i, dji so l’ cok di vo binde,
a Eyet po vos mostrer, ki dj’ so on råle coco :
« C’ est k’ on-z a pris m’ modele, po vos fé des pantots !
« Mins l’ pus laide biesse a m’n ouy, eyet l’ pus vilin boigne,
« C’ est l’ gros blet d’ elefant, ki s’ eva come on boigne !
« I n’ a pont d’ cawe, des orayes, come des dvant d’ djilet,
« On tuyo d’ cawoutchou so s’ vizaedje fwait å rvier,
“ Eyet on cou pus lådje k’ on drî d’ cabriyolet.
— « Ti, dit-st i l’ elefant, vas è dins l’ fond d’ l’ infier
« Po fé tirer t’ binete, cwand ti sreus co muslet,
« On t’ frè chamter a l’ ouxh, foice ki t’ es må velé !
« Dji n’ di nén k’ dji so bea, mins dj’ èn so nén si rete,
« K’ èm matante el balinne ki n’ a ni pîs ni moens,
« Et k’ a ’ne pea co pus rexhe k’ ene coviete a brokete.
— L’ bon Diu e crevant d’ rire, vo ls a tchessî radmint.
— Les biesses ès couyonént, mins les djins fijhént bén pire :
So les difåts d’ onk l’ ôte, i n’ savént nén cwè dire :
Onk c’ esteut on fayé, l’ ôte c’ esteut on vårén,
Èn ôte on parvinou, ou bén on prôpe a rén !
Nos apoirtans deus saetchs, cwand nos tcheyans so tere,
Po mete nos difåts ddins :
L’ nosse, pind padrî no spale, nos shonne todi ledjir[1],
Mins ls ôtes ont l’ leu pa dvant, i nos shonne todi plin.
- ↑ Ene miete candjî po wårder l’ pîtaedje; li mwaisse modêye eploye « i nos chène toudi l'djèrre ».
