El Berbis, l’ Djinixhe eyet l’ Gade avou menir Liyon
Ene berbis, ’ne djinixhe eyet ’ne gade,
Estént avou l’ liyon, po yeusses tchessî a cwate,
El gade tind ses laecets,
Eyet l’ djinixhe estind s’ filet,
El berbis rote a droete a gåtche,
El liyon s’ tape a tere, po bate ès fleme a s’n åjhe.
Dins l’ filet del djinixhe arive on vî singlé,
I s’ efarfouye didins, eyet li vla rzinglé ;
L’ liyon dispece cwate pårts, eyet i prind l’ pus lådje !
— « Çtele-ci m’ ervént dit-st i, pal råjhon k’ dji so rwè !
« Come el pus foirt droci, l’ deujhinme m’ ervént co d’ droet,
« Dj’ prind l’ troejhinme paski dj’ so l’ pus franc d’ tote vo chinaye,
« Si onk waite sol cwatrinme, dji vos l’ apougne pa s’ gaeye.
A pus hôt k’ vos rclamez, n’ a nén d’ avance,
Conte el foice n’ a nén d’ rezistance.
El malete a difåts
L' bon Diu dit on bea djoû, por lu awè s’ plaijhi :
— « Totes les biesses åtoû d’ mi, n’ ont k’ a vni rade s’ ashir,
« Si onk ou l’ ôte so s’ pea, trouve ene sacwè a rdire,
« I n’ a k’ a s’ espliker, et dj’ waitrè d’ el candjî ;
