« Vloz mindjî on boket, po vos rimpli vo vinte,
« I vos fåt radmint vos disfinde !
« Schoûte mu, vén avou mi, èt srès bråmint mieus d’ moens.
— « Oyi mins, dis-t i l’ leu, i fårè bén k’ ti m’ mousses,
« Çki m’ fårè fé drola, por mi wangnî mes crosses ?
— « Preske rén, dit-st i l’ tchén, hagnî ’ne miete les djins,
« Ki vôrént vni prinde no-n årdjint,
« Djouwer avou ls efants, erletchî l’ mwin d’ èt mwaisse !
« Et po tes poennes, t’ irè sokyî dins ’ne caisse,
« Tu mougnrès del pansêye, do foete et do boudin.
— L’ pôve leu breyeut, foice k’ il esteut contin !
Pol prumî côp d’ ès veye, i daléve esse a s’n åjhe.
I vout rabressî l’ tchén, foice k’ il esteut binåjhe.
Mins i voet do moumint, k’ el daléve rabressî[1],
K’ les poys pa dzo s’ goyî, estént tot araetchîs !
— « Lait on pô vir, cwè çki t’ as la po ’ne rogne ?
« Ô, ça c’ n’ est rén ! — « T’ es portant tot schoircî ?
— « C’ est ene pitite sacwè ! Çk’ on t’ åreut fotou ’ne brogne ?
— « Taijhe tu, n’ waite nén ? — Åreut ç’ estî coixhî ?
— « C’ est ptete el plaece del tchinne, ou çki dj’ so alaxhî !
— « Alaxhî, dit-st i l’ leu, et n’ vass nén ou çki t’ vous ?
— « Nén todi ! Çki ça t’ freut del poenne ?
— « Si bén k’ po mougnî l’ sope eshonne ;
A ç’ conte la j’ èn vou nén, èt pous dire ki dj’ m’ è fout.
La dsu, l’ leu prind ses djambes a spale,
I fout l’ camp dins les bos, et co pus roed k’ ene bale.
C’ est po vos dire Françwès : k’ po awè s’ liberté,
On s’ fout co bén d’ esse ritche ! on inme mieus l’ pôvrité.
- ↑ Ene miete candjî po wårder l' pîtaedje; li mwaisse modêye eploye « ki daleut l’ rabressî ».
