K’ les djins trop ambicieus sondjnut bén pa m’n istwere,
Ki gn a on vî proviebe, ki nos dvans todi croere.
Li vci : tchaeke côp k’ on vout, cwand on-z est assez sot,
Peter pus hôt k’ ès cou ! on fwait on trô dins s’ dos !
Les deus Bådets
Deus vî bådets, come di djusse k’ estént d’ Bince,
Rotént so Tchålerwè, tot seus, sins leu bådlî.
Onk tcherdjî d’ såbe, i n’ è pinséve nén moense,
L’ ôte tcherdjî d’ liårds, tot fir shuveut padrî.
Si bén k’ ès cawe nd esteut tote roede,
I stritchive ses orayes ! i fjheut souner s’ garlot !
— Do tiene di Liene, les è vla al copete ;
Ça daléve come so des rôletes ;
Mins arivés dins l’ fond d’ Goblot,
— Deus ratindeus vudnut do Bos !
I strindèt a leu guete ! —
I sôtelnut sol ci k’ a les liårds dins s’ malete,
On lyi prind tot ! e lyi rdårant on côp d’ shabot,
On bon côp d’ pî dins s’ vinte, on côp d’ baston so s’ tiesse,
A mitan dismolowe, i laiynut là l’ pôve biesse,
Ki djemixheut e riclamant s’ camaeråde,
Po co l’ rapåjhî ki lyi dit :
« Schoûte bén : si t’ aveut stî tcherdjî,
« D’ on vî saetch di såvlon come mi,
« Vî coûsse, ti n’ sreut nén si malåde.
