In d’meurant moése tout seû, du pachi et dés prets !
N’paufe guernouye les r’wétet d’tout prét,
Bréyant comme in effant ! d’esbauchie eiét trisse.
N’reine caurette li d’mindet :
« Pouquoé s’qu’elle fiet,
» Ostant d’soupirs, comme des péts d’vat’ches ?
— Enne voyez né, distelle, nia iun d’ieuses deux qui cache,
« A fai chimter l’aute pou iesse Roé !
« L’rossét ley’ra l’pachi ! r’battra basse eiét flache,
« In pestélant fosset et riis,
« In no spochant avét ses pids !
« T’aussi plattes, qué n’fouye dé papî !
« Ieune apret l’aute, faura qui nô zapisse !
« Payant lès pots casséts, pou les z’ouyes dé l’jennisse !
— Elle n’avét né mînti : l’pierdant ça v’nu muchi,
Dain leu fosset, tout desbauchi,
Et pa pougnie les a spochi.
Vô voyét q’tout costét, ét q’dé tout tins, Françoét,
Les p’tites é geins paye nu, l’sottrie des gros bonnets.
Mai n’ia brammin d’leu faute ! I fiont l’sourd eiét l’biesse !
D’allet, vous, stichi dain leu tiesse
« Qu’on fret sain Pape, sain Roés,
« Q’ça cousse brammin dés liards, q’c’est ieuses qui feye nu l’guerre,
Quoéque tous lés geins, sont fréres su terre !
« Q’Jésu-Christ d’viét les paufes, dallet a pids d’escaux,
L’pape dit qui l’lerprésinte, a n’caroche à chî ch’faux !
Des laquais, dés soudarts, dés diamants, et d’z’orreries !
Jésû-Christ prèchét l’pai ! il ôrdonne lés tûeries !
I fai baugi s’chavatte ! qué toupèt ! qué biestrie !
