Pådje:Joseph Kinable - Les crostillons, 1889.djvu/117

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.
(111)

On l’ sét houie, qu’on n’ vinss pu jâser d’Ève et d’Adam
Et prétinde qui c’est d’ zells qui turtot nos d’hiendans ;
On a trové l’ cwacwa, Darwin et tote si clique,
Après s’avu chervou des mèieu d’ leu bèrique,
Ont dit et rèpèté, comme houie on v’ z’el dit co,
Qui l’homme, l’homme tot fî dreut, dihiend dè mârtico.
Ine aute branche di savant soutnet, chesqueune si gosse,
Qu’on pout co mi prétinde qui nos provnans des mosse.
Vérificâchon faite, i fourit riknohou
Qu’ les deux sôre di savant n’avît nin mâ vèiou.
Mais qui po fer v’ni l’homme comme is l’avît el tiesse,
I falléve po kmincî fer cover les deux biesse.
Li prouve enn’ a stu dnaie comme on m’ l’a raconté,
Avou plaisir j’el rind po çou qui m’a costé.
Donc po fer l’expérïince, on chusiha n’ belle mosse,
Et d’on jônne mârtico, on li fa prinde li gosse.
Si vite qu’is s’ètindit, qui l’amour fou st’â jeu,
L’affaire alla qu’arrège ; â bout d’ treus ou qwate meu,
Il arriva n’niaie di crapaut et d’ crapaute,
Ine sôre di drole di gint qu’ tirît st’après nos aute.
En fant croiser les jonne, pauk après arrivît,
Des gint qui nos valît s’is n’valît nin co mî ;
Par mâlheur, fâ-t-i dire, et c’est çou qui m’ tracasse,
Di ces deux rarès biesse, on a stu piede li race.
Kimint volez-ve fer creure à çou qu’ vos racontez,
Qwand vos n’ polez dner l’ prouve qui c’est bin l’ vèrité ?
I n’iat pus qu’on moyen, c’est dè préchî l’ patïince,
Tot rattindant qu’on pôe rinovler l’expérïince.

(I beut deux côp d’aiwe.)

Trover d’wiss qui l’homme vint, tot l’ monde è convairet,
C’esteut mette â grand joû li pus randahe des scret.