On d’na, l’après l’dîner, ine clapante gasse â Roïe, à s’ famille, dè même qu’âx gros bonnets, et les cix qu’avît payî li s’cot po n’aveur qui l’foumîre dè l’sope, si contintît dè braire : Vivât !!!
L’al’nutte tot dè long des balwérs[1] dè l’ Sâv'nîre et d’ sor Avreû, ci n’esteut qui fâssès-pwètes, guirlandes d’if et d’ pâkî, louminaires et verres di totes les coleurs ; adon, po fini, on tira on grand feû d’ârtifice so l’ Rivage Sainte-Bâre et l’ bouket r’présintéve li noû Pont-d’z’-Aches.
Comme cicial est câzî d’ lèvai avou l’ rowe Sor Moûse et, à pau d’ chwès près, à planeûr dè costé dè l’ Châsseie des Prés, li plèce Saint Phoïen cangea d’ viair[2] : wiss’ qu’on n’ veyéve qui des teutais d’ sav’tîs et des kâs’nîres[3] comme li cisse dè vîx Kettin, l’ bârbî-perrikî, des bellès mohones s’èmontît à l’ hauteur di l’èglîse.
Pèheûrowe, si mâssîte dè timps qui l’Abattache y esteut, ci d’gostant batumint avou ses colîres pleintes di sonk’ et les tripaïes des biesses qui les chins herchît avâ l’ pavaie, div’na, qwand on l’ fat baguer âddivant dè l’ Fondreie di canons, ine vraie rowe di rintîs.
Tenneûrowe, avou ses koûves, ses hwèces qui s’ sitârît dispôïe l'aiw’ jusqu’à mitant dè l’ vôïe, ses
