Sûrlet, qu’on noumma ainsi po nos fer r’sov’ni dè baron Râs Sûrlet d’Chôkîr, à quî les Belges, qwand is fourît leus maîsses, volît d’ner l’coronne ; ji n’ sés d’où vint qu’i l’a r’fûzé, lu, in’ èfant dè payîs ?… I n’aveut qu’à fer les qwances d’esse lîbèrâl qwand l’ peupe è l’voléve ainsi et calottin si les électeurs vinît à tourner cazake ; ine sifaite coronne ni deut nin pus pèzer so l’ makette qu’on fâx toupet !
Dè l’ rouwalle âx Sawous et d’on boket dè l’ Pôssèdaie, on fat pus târd li rowe Louis-Jamme, dè no di nosse bon vîx borguimaîsse.
En 1860, on struma li pont Liopôld, qui les vîreusès tiesses di hoïe noum’ront todis l’ Pont-d’-z’Aches.
On fat des grandès liesses à ciste occâsion ; li vîx Roïe y v’na avou s’ famille, on fat n’ grande parâde po fer siervi nos sôdârts à n’ sakwè, on drovia même on concours di rîmège et ji m’ sovins co bin qu’on d’na l’ prix â ci qu’aveut r’mettou nosse Roïe â Solo :
Vis sov’néve bin dè r’mowe-manège,
Qui nos avîs i gn’a trinte ans ?
Dizeu nosse tiesse d’on fwért orège,
On veyéve les sègnes èwarants !
I flaha ses côps hâr et hotte
Et nos bouha cou d’zeur, cou d’zos....
On n’y veyéve câzî pus gotte,
Qwand d’vins l’ nûlaie, lûha l’ Solo.
Ci Solo c’esteut nosse bon Roïe,
C’est l’ pére di s’ peupe, aimans-l’ todis, etc.
Çou qui fat dire, à on sindikeû, qu’onk’ des plakeûs da Louis quatwaze esteut riv’nou à spére.
