C’ est on voyaedjeu k’ arive a Paris avou si tchvå et ene tcherete. Aviè cénk eures al vesprêye, i va boere on vere, et pu deus, troes… mins cwand i vént foû do cåbaret, pupont di tchvå, ni d’ tcherete ! I waite tocosté, mins rén a fé ! Li tchvå et l’ tcherete ont disparexhou.
Vola l’ nute ki tome, et i fwait froed k’ po-z assoti.
Nost ome vout-st aler a l’ otel po doirmi, mins tos les otels estént plins po les fiesses di Noyé. I n’ aveut vraiymint pus moyén do lodjî nolu.
C’ esteut d’ l’ ivier et l’ voyaedjeu aveut bén trop sogne do faleur doirmi a l’ ouxh. « Binamé Bon Diu, ki va dju fé ? » dit-st i.
I tuze on moumint, et volàa k’ i lyi vént l’ idêye do moussî a catchete divins èn otel et di s’ catchî padzo on lét.
Et insi va.
Mins l’ tchambe aveut stî louwêye a ene djonne cope ki fjheut si toû d’ noices. So l’ côp d’ doze eures, les djonnes maryîs rtoumèt e l’ colebire.
Nost ome, catchî padzo l’ lét, waite do n’ pus fé nou brut et i n’ oize pus bodjî d’ on milimete.
Les djins s’ metèt e leu lét, et cmincèt a s’ dire totes sôres di beas mots d’ amour.
A on moumint dné, vola l’ djonne maryî ki dit a s’ feme : « Dins vos ouys, dji voe Paris tot etir. Dji voe Notru-Dame et s’ clotchî, dji voe l’ Aiwe di Sene et tos les ponts, dji voe totes les ptitès rowes si plaijhantes, dji voe… »
« Et bén, dit-st i nosse voyaedjeu, si t’ voes tot ça, di m’ å galop ou çk’ ele est m’ tcherete. »