I.
I corèt-st evoye do viyaedje
Po waitî d’ wangnî leu vicaedje
Lon d’ eyu çk’ il ont vnou å monde.
Dispoy todi, il ont tuzé,
Ostant les loignes ki les sûtis
K’ e dmorant, i s’ alént fé djonde.
« Les vîs, c’ est des målaclevés :
Loukîz come i s’ rixhorbèt l’ nez
Avou l’ mantche di leu camizole. »
Åy, mins zels, i sont co capåbes
Di shure ene passêye, minme dins l’ såbe,
D’ apicî on live a l’ bricole.
Resploe
Åy saiss ! Noste Årdene est mo bele
Tape l’ ouy ! Vo rla ddja les orondes
Mågré k’ elle ont catourné l’ monde,
C’ est vocial k’ elle ont leu tchapele.
II.
‘L ataként a casser ås pires
Ki les aidants n’ savént pus shure
Po les tcherdjî so les begnons ;
Pu les maçner et les rparer
Î astoker èn espalî
Et vo l’ la basteye leu måjhon.
C’ esteut la k’ il alént viker,
Fé des efants, les aclever
Monder les vatches, foyî l’ cortiadje.
I n’ åreut nén stou tins k’ on cale
Avou l’ dossêye dissu les spales
Cabén k’ on soeye hodé d’ l’ ovraedje.
å resploe
III.
Deus coshets, troes poyes ey on tchén ;
Les dinrêyes, ça dipind do tins ;
A l’ cinse, todi åk a tchicter ;
Insi, djamåy pont d’ tins d’ pierdou
Eyet cwand les comeres vlèt rexhe,
Ene dicåce, ça n’ fwait nén rnigter.
Zels k’ ont moussî dins les djindåres,
Dins les buros u dins les dwanes,
I n’ ont pont d’ må po fé leus eures.
Mins ké plaijhi del vicåreye
S’ i fåt trover s’ feme tote måvlêye
D’ esse reclôse tot d’ djoû inte cwate meurs.
å resploe
Dins l' dierinne fråze do dierin resploe, on pout citer l' viyaedje k' on î est si on tchante cisse tchanson la e publik.