Mile ans

Èn årtike di Wikisource.
Aller à la navigation Aller à la recherche

Mile ans

Lès djaléyes vêront,
Lès matins d’ plouve èt d’ vint,
Lès grîjès nûléyes,
Lès brouyârds rilavés d’ârdjint,
Lès nûts d’acî…
Èt d’après ?
Tot l’s-ans, li vint rauye lès dêrins fouyas ;
Èt dji t’ veû todi voltî…
Lès mwaîs timps vêront,
Lès nîves avou leûs blancs moussemints,
Lès-aubes mièrnus,
Lès rotadjes dès solés à claus,
Li pâle solia n’ passerè pus lès nûléyes…
Èt d’après ?
Tot l’s-ans, li vint rauye lès dêrins fouyas ;
Èt dji t’ veû todi voltî…
Ça sèrè l’ timps dès-ôrtîyes,
Dès djèriauds — ni Diu — ni Diâle,
Qwè savenut-i d’ nosse vikaîrîye
Avou leû coûr tot sètch,
Avou leû tièsse di mau-v’nant ?…
Tos l’s-ans, li vint rauye lès dêrins fouyas ;
Èt dji t’ veû todi voltî…

Mile ans èt co qu’ t’ès su m’ vôye, mi vî walon !