Li neûre Marèye, ji m’è r’sovin,
Esteû ’ne foite avinante bâcèlle ;
Ses grands neurs oûye, sès p’tits blancs dint
El fît parètte mèchante èt bèlle.
Portant ci n’èsteû sûre wê-d’choi,
Qu’ine foirt mâle gueûye, vos m’ polez creûre,
Mains ji l’aîméve, rin qu’ d’oyî s’ voix,
Si bèlle voix braire : Dès cûtès peûre !
So l’ trèvin qui j’ hantéve avou,
Ji m’âreû fait dismour por lèye ;
Ji m’ corréve les jambe fou dè cou
A pont dè l’sûr tot avâ l’vèye.
Qwante côp so sès vôye n’alla-j’ nin,
Po l’ vèye aponde è s’frisse mousseure ;
Adonc j’ riv’néve li cour contint
Si j’ l’oyéve braire : Dès cutès peûre !
On m’ disconsia dè l’siposer,
Pace qui ji n’freû mâye bon manège ;
Qu’à l’baguètte èlle mi freû roter
Et qu’ tos lès joû j’âreû l’arège.
Si bin, qu’à l’ longue, ji m’ fa ’ne raison,
J’èl planta là, mains c’ fouri deûr,
Ca m’ cour battéve, qwand c’è qu’ dâ lon
Ji l’oyéve braire : Dès cutès peûre !
Marèye, po r’mètte lès cache è fôr,
M’avoya dès haut’lêye di lètte
Wisse qu’èlle dihéve : « Riv’nez trésôr !
Riv’nez qui ji v’ bâhe à picètte ! »
Mâgré mi, ji n’ rèsponda nin,
Pus vite po fer l’ ci qu’ n’aveû d’keure ;
Mains j’ ploréve mi pârt l’â-matin
Qwand j’ l’oyéve braire : Dès cutès peûre !
On bai jou, Marèye m’arègna
Et d’hèrgea s’ kleuse po m’ fer dès r’proche ;
Puis, d’vins s’ colére, èlle mi k’pougn’ta
Divant co cint gins dè l’ poroche.
Tot pèneu, j’alléve mi mâv’ler
Et l’ fer passer on laid qwart d’heûre,
Mains m’ colére à l’ vole à r’toumé,
Qwand j’ loya braire : Dès cutès peûre !
Dispôye, j’a fait tot po rouvî
Lès prumirès brîhe di m’ jônèsse ;
Mains ji n’ pou, ca pus d’vin-ju vîx,
Pus Marèye mi troublêye li tièsse ;
Enfin, ji l’aîme, j’ènnè so sot,
Di chagrin, ji n’ fai pu qu’ dè beûre ;
Et tote nute, i m’ sonle qui j’ l’ô co
Braire avâ l’ rowe : Dès cutès peûre !