Pådje:Victor Carpentier - Marèye, 1892 (in BSLLW t. 32, s. 2, p. 308-309).djvu/2

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.
— 409 —

Si bin, qu’à l’ longue, ji m’ fa ’ne raison,
J’èl planta là, mains c’ fouri deûr,
Ca m’ cour battéve, qwand c’è qu’ dâ lon
Ji l’oyéve braire : Dès cutès peûre !

4e Couplèt.

Marèye, po r’mètte lès cache è fôr,
M’avoya dès haut’lêye di lètte
Wisse qu’èlle dihéve : « Riv’nez trésôr !
Riv’nez qui ji v’ bâhe à picètte ! »
Mâgré mi, ji n’ rèsponda nin,
Pus vite po fer l’ ci qu’ n’aveû d’keure ;
Mains j’ ploréve mi pârt l’â-matin
Qwand j’ l’oyéve braire : Dès cutès peûre !

5e Couplèt.

On bai jou, Marèye m’arègna
Et d’hèrgea s’ kleuse po m’ fer dès r’proche ;
Puis, d’vins s’ colére, èlle mi k’pougn’ta
Divant co cint gins dè l’ poroche.
Tot pèneu, j’alléve mi mâv’ler
Et l’ fer passer on laid qwart d’heûre,
Mains m’ colére à l’ vole à r’toumé,
Qwand j’ loya braire : Dès cutès peûre !

6e Couplèt.

Dispôye, j’a fait tot po rouvî
Lès prumirès brîhe di m’ jônèsse ;
Mains ji n’ pou, ca pus d’vin-ju vîx,
Pus Marèye mi troublêye li tièsse ;
Enfin, ji l’aîme, j’ènnè so sot,
Di chagrin, ji n’ fai pu qu’ dè beûre ;
Et tote nute, i m’ sonle qui j’ l’ô co
Braire avâ l’ rowe : Dès cutès peûre !