Sol boird di Sambe, et pierdou dins l’ foumire,
Veyoz Couyet avou s’ clotchî crawieus ?
C’ est la k’ dimeure èm matante Dorotêye,
Veve d’ èm mononke Adriyin do Crosteu
E s’ nouve måjhon, nos avans fwait ribote
Dimegne passé tot e pindant l’ crama ;
Pol prumî côp, c’ est la k’ dj’ a veu Lolote
Rén k’ d’ î pinser, sintoz come èm cour bate.
Pol prumî côp, c’ est la k’ dj’ a veu Lolote
Rén k’ d’ î pinser, sintoz come èm cour bate
Gn aveut drola les pus gaiys do viyaedje.
Å dfwait d’ comeres, on n’ aveut k’ a tchoezi.
On a rciné, a l’ ombe, padzo l’ fouyaedje,
Divant l’ måjhon, dilé l’ gros cerijhî.
Èm boune matante a del bire e botaye,
C’ est nén l’ faro k’ est djamåy si bon k’ ça.
Dins s’ tchike, Lolote esteut si bén vermeye,
Rén d’ î pinser, sintoz come èm cour bate.
Dins s’ tchike, Lolote esteut si bén vermeye,
Rén d’ î pinser, sintoz come èm cour bate.
I daléve mia, les panses estant rimpleyes ;
Djan l’ Blankixheu tinguele ès violon
Et dit : « Ms efants, nos avans ci des feyes
Ki n’ dimandnut k’ a danser l’ rigodon. »
A ! ké plaijhi ! Ki Lolote ît continne !
Après l’ cwadrile, on boute ene mazourka
Dji triyanéve e pressant s’ mwin dins l’ minne.
Rén d’ î pinser, sintoz come èm cour bate (2 côps).
Vla l’ swer vinou, po danser, tchaeke si presse.
El violoneu racléve avou ardeur ;
El bire, l’ amour èm fijhént tourner l’ tiesse.
Vint nos di chnik ! dji nedjive dins l’ bouneur.
Mins l’ pa Lolote, e veyant k’ dj’ el rabresse,
D’ on côp d’ shabot m’ fwait plonkî dins l’ purea.
Li cmere s’ ecourt, eyet mi, dj’ èm ramasse.
Ciel ! ké côp d’ pî ! sintoz come èm cour bate.
Li cmere s’ ecourt, eyet mi, dj’ èm ramasse.
Ciel ! ké côp d’ pî ! sintoz come èm cour bate.
Dj’ èm sovénrè do crama d’ èm matante.
Dj’ croe k’ dj’ a l’ cripet cassé ou dismetou.
Dji prind des bagns al wapeur d’ aiwe bolante,
Groumiant des dints tos les côps ki dj’ m’ ashîd.
Mins cwand dj’ divreu sketer m’ dierinne coulote,
E m’ apougnant avou s’ mame eyet s’ pa,
Purade mori ki d’ viker sins Lolote.
Rén d’ î pinser, sintoz come èm cour bate.
Purade mori ki d’ viker sins Lolote.
Rén d’ î pinser, sintoz come èm cour bate.