Sul bôrd dè Sambe, èt pièrdu dins l’ fumêre,
Wèyèz Couyèt avè s’ clotchî crawieus ?
C’èst la k’ dèmeure èm matante Dorotéye,
Veuve d’èm mononke Andriyin du Crosteu.
A s’ neuve mêzo, nos avans fêt ribote,
Lundi passè, tout è pindant l’ crama.
Poul prumi côp, c’èst la k’ dj’é vû Lolote.
Rén k’ d’î pinser, sintèz come èm keûr bat.
Poul prumi côp, c’ est la k’ dj’é vû Lolote.
Rén k’ d’î pinser, sintèz come èm keûr bat.
Gn avèt drola lès pus guéy du vilâdje.
En fét d’ couméres, on n’avèt k’ a tchwèzi.
On a rcinè, a l’ombe, padzou l’ fouyâdje,
Dèvant l’ mêzo, dèlé l’ gros cèriji.
Èm boune matante a dèl biêre in boutèye,
Ç’ n’èst nén l’ fârô k’èst jamés si bon k’ ça.
Dins s’ chike, Lolote estèt si bén vermèye,
Rén d’î pinser, sintèz come èm keûr bat.
Dins s’ chike, Lolote estèt si bén vermèye,
Rén d’î pinser, sintèz come èm keûr bat.
I dalèt mieûs, lès panses èstant rimpliyes.
Djan l’ Blanchisseu tinguèle ès′ viyolon
Èt dit : « M’s-èfants, nos avons ci des fîyes
Ki n’ dimandnut k’a danser l’ rigodon. »
A ! ké pléji ! Kè Lolote ét continne !
Après l’ cadrîye, on boute ene mazurka
Djè triyanè è pressant s’ mwin dins l’ minne.
Rén k’ d’î pinser, sintèz come èm keûr bat.
Djè triyanè è pressant s’ mwin dins l’ minne.
Rén k’ d’î pinser, sintèz come èm keûr bat.
Vla l’ swêr vènu, pou danser chakin s’ presse.
Èl violoneu raclèt avû ardeur.
L’ biêre èt l’ amour èm′ fèyint toûrner l’ tiesse.
Vingt noms di chnik ! djè nadjè dins l’ bouneûr.
Mins l’ pa Lolote, è wèyant k’ djè l’imbrasse,
D’in côp d’ chabot m’ fét plondji dins l’ puria.
L’ coumére s’inkeûrt, èyèt mi, dj’ èm′ ramasse.
Ciel ! ké côp d’ pî ! Sintèz come èm keur bat.
L’ coumére s’inkeûrt, èyèt mi, dj’ èm′ ramasse.
Ciel ! ké côp d’ pî ! Sintèz come èm keur bat.
Dj’èm souvénrè du crama d’èm matante.
Dj’ crwè k’ dj’é l’ cripet cåssè ou bin dèsmi.
Djè prind dès bins al vapeur d’eûwe boulante,
Grignant dès dints tous les côps kè dj’ m’achîd.
Mès cand dj’ dèvrè skèter ’m dérène culote,
In m’impwègnant avè s’ mame èyèt s’ pa,
Putot mori ki d’ viki sin Lolote.
Rén k’ d’î pinser, sintèz come èm keûr bat.
Putot mori ki d’ viki sin Lolote.
Rén k’ d’î pinser, sintèz come èm keûr bat.
Lolote (Sintèz come èm keûr bat)
Ciste ouve ci egzistêye eto divins ds ôtès ortografeyes : Rifondou.Lolote (Sintez come èm keûr bat)
s.d.
Lolote (Sintèz come èm keur bat)