L’ afwaire si passe e 2015 divins onk des pus grands botikes di Hanut ou çki les pôvès djins vont fé leus coûsses avou des tcheretes ås rôletes pus grosses ki les berwetes di lastîltins, po-z atchter çou k’ il ont dandjî et bråmint des otes afwaires k’ i s’ endè pasrént bén.
Divinltins (aviè 1950), a Tîne, i n aveut catoize botikes, troes botchîs, troes boledjîs, troes coibjhîs po siervi doze cint djins k’ alént fé leus comission a pî ou a velo, avou des tchenas. Les botikîs estént siervicires et plaijhants et i dmandént d’ vos noveles.
Ådjourdu, les djins vont-st a Hanut, e-n oto, divins des grands botikes sins åme ; i s’ siervèt zels-minmes po rimpli leus tcheretes avou des produts industriyels, et i paynut a l’ caisse a ene enocinne ki n’ a, l’ pus sovint, nén achevé ses scoles, k’ est la pask’ i fåt bén, ki s’ è fote di vosse santé et d’ vos efants, k’ a on vizaedje di cwareme et ki n’ kinoxhe nén les noveles di vosse viyaedje. Come li Noyé n’ esteut nén lon, nosse dame si dit : « dji vôreu bén apontyî on bea såmon po mes djins ki vénront dinner. Dji n’ a djustumint rén dvins les pîs po l’ moumint ; dj’ årè bén l’ tins d’ el cure et dj’ el metrè e mi edjaloe (condjelateur).
Arivêye å botike k’ on-z-a dit, i gn aveut pont d’ såmon. « C’ est trop timpe. » dit-st ele li feme k’ est metowe po les pexhons « Po les fiesses, i n årè bén sacwants såmons, mins nén bråmint, et i vos les fåt kimander a l’ avance. » « Bon, dit-st ele nosse dame, dji rvénrè pus tård », ey ele va po sôrti, mins tot passant dvant l’ reyon des legumes, ele voet on bea gros vete cabu : ene bele biesse, po 99 cenes.
« Dji n’ a nén vnou po rén, pinse-t ele e leye minme, et come nost ome inme bén ça, k’ i ndè magnreut tos les djoûs, si dj’ el schoûtreu, i serè bén contin. » Vos fåt dire ki c’ est èn ome ki n’ costêye waire : des canadas, do lård et del vete djote, et i magne mia k’ on rwè.
Ele prind l’ djote, li mete e-n on saetch di plastike et-z endè va po payî. Li djonne ome, a l’ caisse, poente l’ årtike tot fjhant ene xhene di disgosté et lyi dit : « c’ est tot ? èn uro swessante-nouv ! » « A, dji vs dimande bén pardon, dit-st ele nosse dame, li cabu esteut afitchî 99 cenes. » « Neni, neni, c’ est 1,69 €, Waitîz l’ ordinateur, madame, ki dit ki po on frizé cabu, c’ est 1,69 €. » « Mins ç’ cabu ci, c’ est on vete cabu et nén on frizé. (Vos savoz bén ki les frizés cabus, c’ est po fé del vete tripe k’ on magne voltî å Noyé.)
Li djonne ome dimeure li boke å lådje, come èn ewaeré. Après deus munutes di reflecsion – la k’ on voet bén k’ i s’ sipeye li tiesse avou on problinme k’ on n’ lyi a nén apris e scole – i dit : « Dji va vey ! » Et il eva disk’ å buro po-z espliker l’ afwaire a on pus chef ki lu, epwis i rpasse å reyon des legumes et i markêye li pris des vetès djotes so on papî po n’ el nén rovyî. « C’ est 99 cents, dit-st i, mins come c’ est dedja poenté a 1,69 €, dji vs doe rinde li dferince avou des çanses. » Et i s’ ritoûne so l’ ome k’ est a l’ ôte caisse : « Emîîîle, ça fwait kibén ça : 1,69 € moens 99 cenes ? » L’ ôte tûze. Nosse dame, k’ est ddja la dispoy vint munutes rén ki po ene vete djote, respond e s’ plaece : « C’ est 70 cenes. » L’ ome del deujhinme caisse k’ a infén rtrové ene machene a carculer e fond d’ on ridant, djoupe : « 80 cenes. »
Eplaidî sins mete li fén (ki vos trovroz sol mwaisse modêye) dins l’ Rantoele 93, bontins 2020.