On vrêye

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Rifondou.
On vrêye
2015/2020

C’èsteût li mièrkidi 25 di novimbe 2015 : l’afêre si passe divins onc dès pus gronds botikes di Hannut ouc’ qui lès pôvès djins vont fé leûs coûses avou dès tchèrètes à rôlètes pus grosses qui lès bèrwètes di l’a sti l’timps, po-z-akter çou qu’i-z-ont dondji èt bråmint dès otès afêres qui s’ènnè pas’rînent bén…

Divint l’timps, à Thîn’, (après l’guêre, avè 1950) i n’aveût 14 botikes, 3 botchis, 3 bolèdjis, 3 kwèpis, etc. po sièrvu 1.200 djins qu’alînent fé leûs coûses à pîds ou à vélo, avou dès tchènas : lès botikîs èstinent sèrvicîres èt plêhonts èt i d’mondînent di vos novèles.

Ådjoûrd’hu, lès djins vont-st-à Hannut, en ôto, divint dès gronds botiques sins åme ; i s’sièrvèt zèls min.me po rimplî leûs tchèrètes avou dès produits industrîyièl, èt i påy’nèt à l’kêsse à eune ènocin.ne qui n’a, l’pus sovint, nén achèvé sès scoles, qu’ èst là pask’i fåt bén, qui s’en fout d’vosse santé èt d’vos èfonts, qu’a on visèdje di cwarème èt qui n’kinoche nén lès novèles di vosse viyadje…

Tot çolà a sti volu po v’ fé dispinser vos çans, fé rôler vos måsihès ôtos, ènnè fé profiter li gouvernemint, lès agro-industrîyèls èt les bankîs, èt mète lès djins di måle eumeûr èn-èsprès, come çà i rèclam’ront co eune miyète du pus èt tont qu’i s’occupèt à dès bièstrîyes…

Come li Noyé n’èsteût nén lon, nosse dame si dit : dji voureû bén apwintî on bia såmon po mès djins qui vinront dîner. Dji n’a djustumint rén d’vins les pîds po l’momint ; dj’ årè bén l’timps d’èl cûre èt dj’ èl mètrè è m’ condjèlateûr.

Arivéye å botike qu’on-z-a dit, i gn’aveût pon d’såmon. — C’èst trop timpe disti-èle li fème qu’èst mètouwe po lès pèhons.

L’èst vrèye ossi qui po l’momint, on n’vint qui dès pèhons qui kostèt mwart tchèr. Po lès pèhons bon-martchî, rotez vosse vôye. N’a ringne à veûye : — Po lès fièsses, i n’årèt bén saquonts såmons, mins nin brâmint… èt i vos lès fåt kimonder à l’avonce.

— Bon, distèl noss’ dame, dji r’vinrè pus tård…èt èle va po sôrti, mins to passont d’vont l’rèyon dès lègumes, èle veût on bia gros vèt’ cabus : eune bèle bièsse, …po 99 cents.

Dji n’so nén v’nouwe po rén, pinse-t-èle è lèye min.me, èt come nosse-st-ome in.me bén çà, qu’i ’nnè magn’reût tos lès djoûs, si dj’èl hoûtreût, i sérè bén contint. Fåt v’ dîre qui c’èst-st-eune ome qui n’cosse wêre : dès canadas, dè lård èt dèl vét djote, èt i magne mia qu’on Rwè.

Ele prind l’djote, li mète è n’on sètche di plastic èt-z-ènnè va po payî.

Li djôn.ne ome, à l’kêsse, pwinte l’årtike tot f’zont eune higne di disgostè èt lî dit :

— c’èst tot ?? ?… un euro soixante neuf !! »

— Ah, dji v’ dimonde bén pardon, distèl nosse dame, li cabus èsteût affiché 99 cents.

— Nènni, nènni, c’èst 1,69 €, disti l’djôn.ne ome.

— Dj’a portant bén vèyu 99 cents.

— L’ordinateûr, Madame, dit qui po on frîzé cabus, c’èst 1,69 €.

— Dji vou bén tot çou qui l’ordinateûr raconte, mins c’cabus-ci, c’est-st-on vèt cabus èt nén on frîzé.


(Vos savoz bén qui lès frizés cabus, c’est po fé dèl vèt trip’ qu’on magne voltîye å Noyé. Vos vèyoz bén qui quond’ c’èst po vinde mwart tchère eune frîzée djote d’à hipe on d’mèye kulo à 1,69 € [= 70 Bef/kg] on n’èst nén trop timpru po lès fièsses…)

Li djôn.ne ome dimeure li boke å lådje, come eune èwaré : …après deûs munutes di rèflèksion – là qu’on veût bén qu’i s’sipîye li tièsse avou on problème qu’on n’ lî a nén apris è scole – i dit come Léyon d’Biètrèye qu’a eune calote po moster qu’il èst chef :

— dji va veûye !

Èt il è va disk’å burô po-z-èspliquer l’afêre à on pus chef qui lu, èt pwis i r’passe å rèyon dès lègumes èt i marquèye li pris dès vètès djotes so on papî po n’nén l’rovî.

— C’èst 99 cents, disti, mins come c’èst dèdjà pwinté à 1,69 €, dji deû v’rinde li d’fèrince avou dès çans …èt i s’ritoûne so l’ome qu’èst à l’ôte kêsse :

— Emîîîle, ça fait combien çà : 1,69 € moins 99 cents ??…

L’ôte tûze…

Nosse dame, qu’ èst djà là dispoye vint munutes rén qui po n’ vèt’ djote, rèspond è s’place :

— c’èst 70 cents.

L’ome dèl deûzème kêsse qu’a anfin r’trové eune machine à calculer è fond d’on ridon, djoupe :

— 80 cents.

Nosse dame, énèrvéye, n’a nén polu s’èspêtchi dè dire :

— vos n’avoz nén apris li d’fèrince qui gna inte on vèt’ cabus èt dèl frîzée djote, mins vos n’avez nén apris à compter nén pus !

L’ome si d’monde çou qui lî arive, i rind 4 pèces di 50 cents qui volèt ossi vite è cabas èt come i n’ s’èscuze nén po l’èrêur, nosse dame achève dèl touwer tot li d’hant :

— …nè l’politesse !

Nosse dame rivint èl mohone mi raconter comint qu’èle a-st-akté eune djote di treûs bons kulos à 0.99 cents, èt qu’èle a djondu lès multi-nationåles po 31 cents. Po çou qu’èst dèl djote, on-z-ènn’årè sûr po 4 côps, avou 2 kulos d’canadas dè djardén èt 6-7 € d’ crètons d’lård, volà eune dimèye sawin.ne po l’pris d’on vère di bîre…

Li djôn.ne ome al kêsse aveût à prume 20 ons ; c’èst-st-on chômeur mètu à l’ovradje qui lès gronds botiques sont-st-oblidjîs d’ègadjî ; i parèt qu’il a sti s’plinde å s’ Sint-Diktat qui « lès clients èstînent mètchonts èt qu’il èsteût èksploité à fé on dère mestî po on salère di minâp’… »

**************

On pout k’minci eune discussion : …volà çou qu’dj’a trover è dictionêre sus l’ovradje :

Bouter, kibouter, Kèn’ter, Kèw’ter, Cowî, Fwarcî, Grèter, Hètchî, Trîmer, Tchoûkî, Tchèssî, Fé ’ne fwèce, Si hiner è cwate, Si hiyî è cwate, Si distrure, S’èsquinter Si sansouwer, S’agridjî, S’aglidjî, Si mète én-oûwe Si spiyî lès rins, S’arèdjî, S’arèner, Si crèvinter Si fé crèver, S’ovrer tot mwèrt Ovrer… timpesse, ovrer qui po-z-arèdji,… À s’fé toumer mwért, …à s’fé crèver, …à l’arèdje, …à blame à pleins brès, …à fwèce, …foû fwèce, à råyî tot, à råye-cou, Come on pierdou, come on nègue, come on råyeû, come ine arèdjî, come on boû, come on tch’vå, come ine bièsse, come on flamind

Et quond’ on n’ aleûve nén vite assez, mi vîye mame dijeûve è s’lingadje d’Humptinnes, :

— Vos n’poloz mô dè v’ tchèter one tripe !


(Walon d’Thîn’)